Raphael Warjri
Ka khuid ka suba ka long kaba donkam ha baroh ki liang bad ka tyllong ban peiphang shaphang kata ka dei hi ha ka janor briew. Lada ka khuid ka suba ka la shong tynrai ha ka jingmut jingpyrkhat kata hi ka la biang ban pyiar sha kiwei kiwei ki bynta jong ka khuid ka suba la ha ka met ka phad ka iing ka sem ka shnong ka thaw, lane ha lynti syngkien, ha khlaw ha btap kyllum lang ha ka imlang sahlang, ha ka longbriew manbriew. Kaba khuid ka janor ka long hi kaba phngaiñ ka mut ka pyrkhat bad ka pun lynti sha ka hok. Haba khuid ka mut ka pyrkhat lait na ka tharai sniew, lait na ka suba ka artatien, lait na ka syier mynsiem bad ka sngur ka mut ka pyrkhat ha lade bad shai kdar haba khmih ïa kiwei ha ka pyrthei mariang sawdong. Ban kot ka mut ka pyrkhat haduh katta ym dei kaba suk haba ka pyrthei hi ka la paw ki nongmuna kiba la jia bad ïai jia ha ka imlang sahlang haduh ba lada shim kyllum ym lah khlem suba sniew ne artatien ne syier mynsiem ia kiei kiei ki ba lah ban lam sha ka ban babe lane shem lanot ha la marwei na ka daw ba shañiah ïa kiba sylla ban pynsniew ïa kiwei. Jar la katta haba sngur la ka mynsiem lajong lah ban kiar da kaba long ki ba husiar bad pyrman na pajih ïa kiei kiei, khlem da bishar lypa ïa kaei kaba khlem pat lap ïa ka jingshisha. Teng teng kaba ym lah shah lane ka ba lap lap than u thylliej ka lah ban lam sha kaba shu pharep lamler khlem nongrim bad kata ka pynjyrsieh ïa la ka mut ka pyrkhat bad ka jngut noh ha ka jaka ba kan ïaineh ka jinglong sngur ka jinglong khuid. Kumta ka ba long shngaiñ hi ba ka janor kan ym jyrsieh ka long ban tynkan na kaba khlei ka juban kaba lah ban kylla khongpong. Kumta dei ban teh lakam la u thylliej bad husiar na kaba bishar lypa ïa kiei kiei bad ban khmih sani shwa ïa kiei kiei shwa ban bishar khnang ban shai kdar bad ïeng ka hok.
Ka um ka ba shong halor ktieh lada khlem kyrsoi ne tynruh ka ïai sah sngur, hynrei ka um kaba shong halor mawramsong lada tynruh ne kyrsoi ka lah ban jngut. Khnang ba kan ïaisah sngur lada dei ha um ktieh, ne ha shyiap, ne ha mawramsong ïa ka um ym dei ban tamti, ym dei ban kyrsoi ne tynruh ba kan shai. Ha ka jingim briew ruh ka long kumta khamtam haba la roi ka imlang sahlang bad la khleh bunjait ki jinglong briew ym lah lait na kiei kiei ki ba sniew lada dei ka thok ka shukor, ka arsap arphong, ka phon ka shetkylla, ka iuhroit ka thombor, ka ibeiñ ka ñiewpoh, ka meng ka hangamei, ka shun ka pen bad kumta ter ter. Kumta ka ba khuid nalor bad hapoh ka long kum u mawdong na ka bynta ban tei ïa ka imlang sahlang ka ba koit ba khiah bad kaba shongsuk shongsaiñ. Ka palat liam na u pud jong kaba khuid ka met ka phad ka ïing ka sem ka shnong ka thaw bad kiei kiei kiba lah ban iohi da ki khmat briew lane ban twad da la ki kti. Ka ba khuid la ka janor bad ka dohnud ka pynlong ïa ka mynsiem briew kaba sngur bad ïengskhem ha ka hok khlem artatien. Kine kiei kiei baroh ki dei ban sdang na lade ban long khuid shwa ka janor lajong ha ka mut ka pyrkhat, bad shisien ba la khuid ka janor ka la kynto hi ïa la ka dohnud ba kan long kaba sngur khlem thohbria. Ym don tang iwei na ki briew ban kwah ba ka janor kan jaboh bad ka dohnud kan jngut, baroh baroh ki kwah ban bha mynsiem bad ban pynbha lem ïa kiwei khnang ba ka imlang sahlang kan long kaba khuid ba suba.
Kawei na ki jinglong ka ba pyntor bad pyntroiñ ïa ka jingim briew ka dei ka bamsap bampong kaba lah ban ktah jur ïa ka met ka phad, ïa ka janor, ïa ka dohnud bad ïa ka mynsiem briew ha baroh ki liang jong ka kam korbar ha ka imlang sahlang bad ka longbriew manbriew. Ki ba tuh pyrshah namar ba ki duk ki kyrduh ki lah ban long kiba khuid ka mynsiem, wat lada dei ban phla hok ha ka lympung bishar paidbah. Wat kiba pyniap briew ruh ki lah ban long ki ba khuid mynsiem haba ki leh ïa ka kam bymman na ka daw kaba ym banse haba don ki riewsniew kiba sdang shwa ban mushlia ïa ka jingim ha ka longïing longsem jong kita kiba shah ktah na kata ka kam bymman. Kiba thoh ba shukor ruh ka lah ban long ba ki kwah ban lait la ka met lajong na kano kano kaba duh nong ne duh myntoi ha kaei kaei ka kam ha kaba ïadei para briew ha ka imlang sahlang. Hynrei ki ba bamsap bampong ki dei kiba arsap arphong bad ki ba kham sniew ban ïa kito kiba leh ki kam bymman pyrshah bad phla hok ïa la ki kam bymman. Ki ba bamsap bampong ki pynpaw sha ka pyrthei kum ki ba hok ba shida, hynrei na lyndet ki klop bad knieh lyndet ïa ka bhah jong kiwei na kyrpong. Kumta la shem ba ki ba bamsap bampong ki phuh ki phieng bha ha ki ryta ba ki dang ioh kabu ban kmen lyngngai ha ka spah bym hok, hynrei bunsien ki kylla syrtok ha ka khyllipmat ba khatduh bad ki mad ïa ka shem lanot kaba la bam kruiñ naduh kita ki por ba ki dang lah ban leh sahuh. Ka ba bam kruiñ ka mut ba ha ka jingshisha ki briew ba bamsap bampong wat lada ki paw kumba ki kmen bad ki suk mynsiem ha kita ki ryta ba ki dang pahuh bad leh sahuh da ka spah bym hok, hynrei ha ka jingshisha ka jingiatiplem kam ju ai thiah suk ïa ki bad ki dukha ka mynsiem shilynter bad ki sa troiñ syndon ynda la akher ka sngi.
