Jowai, Jylliew 09
Ka lympung ïalehkai chess kaba ar sngi ba la tip kum ka “Jaiñtia Hills District Chess Competition cum State ‘B’ Tournament” ba la pynïaid da ka Jaiñtia Hills District Chess Association (JHDCA) ka la poi noh sha kaba kut ha ka sngi Saitjaiñ ha Hall jong ka Thomas Jones Synod College Jowai.
Ha kane ka sngi la donlang u District Sports Officer (DSO), West Jaiñtia Hills u Bah Khroobok Passah kum u kongsan.
U Bah P. Lhuid President ka Jaiñtia Hills District Chess Associa-tion haba ai jingkren, u la ong lyngba kane ka lympung yn jied 6 ngut ki khynnah ban mihkhmat ïa ka District sha ka State Championship ka ban sdang naduh ka 12 haduh 15 tarik Jylliew ha nongbah Tura.
U Bah Khroobok Passah ha ka jingkren u la aikhublei ïa ka Jaiñtia Hills District Chess Association kaba la pynlong ïa kane ka lympung kaba long ka jingïalehkai kaba pynproh ïa ka jabieng jong u ne ka khynnah.
U la ong ka Jylla ka la kiew bha ha kaba ha u snem ba la dep ka la lah ban pynlong ïa ka lympung International Level ha Shillong.
Ha kane ka sngi la ai sngewbha ruh ïa ki khusnam sha ar ngut ki khynnah kynthei kiba ïashim bynta ha kane ka lympung kumjuh ïa ki khynnah kiba hapoh 13 snem bad 17 snem rta.
Ki nongjop ha ka Open Category ki long u Roben Suting, Dapmon Bang bad Elangki Rymbai, katba ha ka Under-17 Category ki long u Zephaniah R Dkhar, Braxton Ryan Lamare bad Leon Raymond Rymbai.
