Shillong, Jylliew 09
Ka lympung ïalehkai phutbol ba la tip kum ka District Level Inter School Subroto Cup Football Tournament 2024 ban pynïaid da ka shlem treikam u District Sports Officer (DSO) East Khasi Hill kan sdang mynta ka Lah Sngi U Blei ha kane ka nongbah.
Ha kane ka lympung yn wan shim bynta da ki skul kiba napoh kane ka district ha ki kyrdan ïalehkai Under-15 jong ki shynrang bad ka Under-17 ha ka liang ki kynthei bad shynrang. Ïa kane ka lympung yn pynlong ha madan Third Ground jong ka MFA ha Polo bad ha Madan Heh Mini Stadium kaba ha Mawlai Phudmuri.
Ki kynhun ki ban ïashim bynta ha ka U-15 ki don 12 tylli ha kaba yn pynïalehkai ha Madan Heh, katba ha ka U-17 ki kynthei ki don 5 tylli bad ha ka U-17 ki shynrang ki don 14 tylli ka ban pynïakhun ha Third Ground, Polo.
Ha kawei pat ka liang ïa kane kajuh ka lympung yn pynlong da ka shlem treikam u DSO Ri Bhoi District naduh ka Sngi Ba-ar ha madan Nongjri bad Umran Niangbyrnia ha Ri Bhoi Distict. Katba ha South West Khasi Hills kane ka lympung ka la nangjam shaphrang naduh ka Sngi Thohdieng mynshem taïew.
Ki kynhun ki ban rah ïa ka lahduh ha kitei ki kyrdan ïalehkai kin ïoh ïa ka lad ban mihkhmat sha ka State Level Subroto Cup Football Tournament 2024 ka ban long ha kane ka nongbah.
