Shillong, Jylliew 09
Ka Coco Gauff bad ka Katerina Siniakova ki la rah ïa ka nam lahduh ha ka women’s doubles jong ka French Open hadien ba ki la lah ban pynliem noh ïa ki nongïalehkai na Italy ka Sara Errani bad ka Jasmine Paolini da 7-6(5) 6-3 ha ka jingïakhun final kaba la long ha ka Sngi U Blei.
Ka Jasmine Paolini ka dei kaba la mad ïa ka jingshah rem ha ka jingïakhun final para marwei jong ki kynthei da 6-2 6-1 ha ka Iga Swiatek ha ka Sngi Saitjaiñ.
Kane ka long ka jingjop kaba phra na ka bynta ka Siniakova ha ka Grand Slam bad kaba nyngkong eh ïa ka Gauff ban rah ïa ka nam lahduh.
Ha kane ka jingïalehkai kaba la neh shi kynta ka la long kaba ïakhaid bha hapdeng ka Errani bad ka Siniakova ha ka set kaba nyngkong. Hadien ka Paolini bad ka Errani ki la lah ban tam da 5-3, hynrei ka Siniakova ka la ïakhun tyngeh ryngkat bad ka Gauff.
Wat la kitei ki ‘thei ïalehkai na Italy ki la ïai bteng ban ïakhun tyngeh, hynrei ka Gauff bad ka Siniakova ki la lah ban pynurlong na ka bynta ban tam da 2-0. Kane ka la long ka jingpynduh mynsiem ïa ka Errani bad Paolini bad ha kaba kut ka Gauff bad ka Siniakova ki la lah ban pynpaw ïa ka jingtbit na ka bynta ban tam biang da 5-3 bad ban rah syndon ïa ka jingjop.
