Shillong, Jylliew 09
Ka kynhun ïalehkai phutbol ka ri ka la poi ha Doha ha ka miet jong ka sngi Saitjaiñ na ka bynta ka lympung ïalehkai FIFA World Cup 2026 bad AFC Asian Cup 2027 Preliminary Joint Qualification Round 2 pyrshah ïa ka Qatar, ka ban long ha Jassim bin Hamad Stadium ha ka Sngi Ba-ar.
Na ka liang u coach u Igor Stimac u la pynbna ïa ki 23 ngut ki rangïalehkai na ka bynta katei ka jingïakhun. Nalor u kapten u Sunil Chhetri, uba la shongthait na ka kam ïalehkai na ka bynta ka ri hadien ka jingïakhun pyrshah ïa ka Kuwait ha ka Sngi Palei, ki rangïalehkai shadien kiba kynthup ïa u Amey Ranawade, Lalchungnunga bad u Subhasish Bose kim shym la leit lang bad ka kynhun sha Qatar namar ki daw shimet.
Halor u Ranawade bad u Lalchungnunga, u Stimac u la ong, “Nga sngewkmen eh ba kine ki rangïalehkai ki la ïadon bynta lang bad ka kynhun. Ngi la ïoh ban ïakren sani bha ha shwa ban pyllait ïa ki bad ki tip bha ha kano ka bynta ba ki donkam ïalehkai bha na ka bynta ka kynhun. Nga kyrmen skhem ba ki donkam ïa ka por bad kin wanphai da ka jingkhlaiñ bor.”
Ha kaba ïadei bad u kapten u ban ïalam ïa ka kynhun, u Stimac u la pynkhamti ha u rangapkol u Gurpreet Singh Sandhu na ka bynta kane ka jingïalehkai ka ban long ha ka Sngi Ba-ar. Lyngba ka jingïoh ban ïalehkai haduh 72 sien na ka bynta ka ri, utei u rangap kol ba la 32 snem ka rta, u long uba tbit bad uba la don bynta la kham slem bad ka kynhun ïalehkai ka ri hadien u Chhetri.
“U Gurpreet u long uwei na ki kapten jong ngi uba la don bynta lang bad u Sunil lem bad u Sandesh (Jhingan) ha ki san snem, te kumta u la long uba dei hok ban shim ïa kane ka lyngkor ha kane ka kynti kaba mynta,” la ong u Stimac.
Ka Qatar ka la ïoh rung lypa sha ka wat kaba lai hadien ba ka la ïoh ban bat ïa ka kyrdan ba hakhlieh na ka group-A. Na ki 20 ngut, kane ka kynhun ka don haduh 21 ki rangïalehkai kiba dang hapoh 24 snem. Kane ka kynhun kaba la khur ar sien ïa ka nam lahduh ha Asia, ka la ïakhaid khlem don ba thep kol pyrshah ïa ka Afghanistan ha Hofuf, Saudi Arabia ha ka sngi Palei.
“Ngi la ïoh ban sakhi ïa ka jingïalehkai hapdeng ka Afghanistan pyrshah ïa ka Qatar bad ngin pyrshang ban ïalehkai bha ha ka bynta kaba shakhmat ha katei ka jingïakhun. Te kumta ngi khmih lynti ban pynurlong ha ka ban thep kol,” la ong u Stimac.
Ka India ka dang don jingkyrmen ban ïoh rung sha ka wat balai ha kaba ka la don ha ka kyrdan ba-ar bad kamai 5 point (-3). Katba ka Afghanistan ka la ïakhaid khlem don ba thep kol bad ka Qatar bad ka dang sah ha ka kyrdan balai bad kamai 5 point (-10). Ka Kuwait ka la don ha ka kyrdan ba sha trai bad kamai 4 point.
Kumta ka India ka lah ban ïoh rung sha kawei pat ka wat tang lada ka lah ban pynliem ïa ka Qatar bad ruh ban pynïapher ha jingthep kol na ka Afghanistan, ka ban ïakhun pyrshah ïa ka Kuwait ha katei kajuh ka sngi.
