Ka Sorkar Pdeng bathymmai hapoh ka jingïalam jong u Narendra Modi kum u Myntri Rangbahduh lane ka Sorkar Modi 3.0 ka la bam smai ha ka Sngi U Blei ha Rashtrapati Bhavan, bad kane ka la long ka jingsdang jong ka sorkar hadien ba la kut noh ka ilekshon sha ka Dorbar Lok Sabha kaba 18. Ryngkat bad ki Modi, ki MP kiba la bam smai kum ki Myntri ha ka kyrdan ‘Cabinet’ ki don haduh 30 ngut, bad don na kine kiba la long Myntri naduh u snem 2014 ha ka por ba u Modi u la shimti ha ka sien banyngkong ïa ka shuki Myntri Rangbahduh. Ha kane ka sngi ba u Modi u la bam smai ha ka sien kaba lai kum u Myntri Rangbahduh, ki la don kumba 8,000 ngut ki briew ha ryngkat ki nongïalam na ki Ri kiba marjan bad ka India kiba la sakhi.
Kine ki Myntri ha ka kyrdan ‘Cabinet’ ki long u Raj Nath Singh, Amit Shah, Nitin Jairam Gadkari, Jagat Prakash Nadda, Shivraj Singh Chouhan, Nirmala Sitharaman, Dr. Subrahmanyam Jaishankar, Manohar Lal, H. D. Kumaraswamy, Piyush Goyal, Dharmendra Pradhan, Jitan Ram Manjhi, Rajiv Ranjan Singh (Lalan Singh), Sarbananda Sonowal, Dr. Virendra Kumar, Kinjarapu Rammohan Naidu, Pralhad Joshi, Jual Oram, Giriraj Singh, Ashwini Vaishnaw, Jyotiraditya M. Scindia, Bhupender Yadav, Gajendra Singh Shekhawat, Annpurna Devi, Kiren Rijiju, Hardeep Singh Puri, Dr. Mansukh Mandaviya, G. Kishan Reddy, Chirag Paswan, bad u C R Patil. Nalor jong kine, ki don sa san ngut ki Myntri Khynnah (Independent Charge) bad 36 ngut ki Myntri Khynnah. Haba kheiñ kyllum naduh u Myntri Rangbahduh, kane ka Sorkar Modi 3.0 ka don haduh 72 ngut ki Myntri. Ka long shisha ka sorkar kaba heh, hynrei haduh katno kan lah ban treikam bha, ka por kan sa batai.
Ha kane ka sien, u Modi um banse ban kham ai jaka lem ïa ki nongïalam jong ki seng saiñpyrthei kiba don ha ka lama jong ka National Democratic Alliance (NDA) na ka daw ba ka BJP tang marwei ka khlem lah ban ïoh palat 272 ngut ki MP ha ka ilekshon. Ha u snem 2014 bad 2019, namar ba ka BJP ka la jop kput, ka khlem da ñiew burom than ïa kiwei pat ki seng kiba don ha ka lama jong ka NDA. Ka long ruh ka sien banyngkong ïa u Modi ba un ïalam da ka sorkar synrop kaba paka naduh ba u la long kum u Myntri Rangbah ka Gujarat ha u snem 2001 bad haduh ba u la long u Myntri Rangbahduh ha ka sien kaba ar ha u snem 2019. Ngi la ïohi kumno ka sorkar u Modi ka la treikam ha ki 10 snem kiba la leit noh, bad ki don shibun bah ki jingduna watla ka sorkar ka la kam ba ka leh bha ha kiba bun ki liang. Ngim tip kane ka sorkar khleh khaw lang kaba mynta kan long kumno ha ka jingtreikam, hynrei ngi shu kyrmen ba kan kham leh bha ban ïa kito ki artylli ki sorkar kiba la leit noh.
Ngi donbok ba ha kane ka kynti, ki paidbah ki la pynjop palat 200 ngut ki MP ki ban shong ha ka liang pyrshah. Lada ngi donkam ïa ka sorkar kaba khlaiñ, ngi donkam ruh ban ïoh ïa ka liang pyrshah kaba khlaiñ bad kaba treikam. Ngi khmih lynti ba kine ki MP liang pyrshah kin woh daw woh kjat ïa ka sorkar haba ka shim ïa ki rai ne ki sienjam kiba long pyrshah ïa ka mon jong ki paidbah ba bun ba lang. Hooid, ngim kwah ban ïohi ïa ka huri-hura hapoh Parliament, tangba ngim kwah ruh ban ïohi ba ka sorkar kan shu leh donbor lut kat ïaba don namar kane kan ym wanrah jingbha kumba ngi la sakhi ha ki 10 snem kiba la leit noh. Ki paidbah ruh kin hap ban long kiba peitngor bad ban pynbor ïa ki MP ki jong ki ban treikam ha ka rukom kaba dei.
Ngim tip la kane ka Sorkar Modi 3.0 kan neh haduh kaba kut ka san snem ne kan khyllem noh tang shiteng por lane kan wan da ka ilekshon bathymmai. Ka por kan sa batai. Hynrei ngi khmih lynti pat ba katba ka dang bat ïa u lakam jong ka jingsynshar, kan peit ba ka bha ka miat kan don ha ka Ri. Ka sorkar ruh ka dei ban kiar noh na ka jingpynïashrut ïa ki nongshong shnong ha ka kyrteng jong ka niam namar ki paidbah ki la dep ban ai jubab ha ka por ilekshon halor ka saiñpyrthei kaba thmu ban pynjot bad pharia ïa ki briew. Baroh ki kwah ban ïa im lang hapdeng ka jingsuk bad jingshngaiñ bad ym ka jingïashrut bad jingïakynad. Ngi kyrmen ba ka sorkar ka la sngewthuh ïa kata da kaba peit na ka jingmih na ka ilekshon Lok Sabha.
