Shillong, Jylliew 10
Ka lympung ïalehkai District Level Inter School Subroto Cup Mukherjee Football Tournament 2024 ba la pynïaid da ka shlem treikam u District Sports Officer (DSO) East Khasi Hill ka la sdang ha ka Lah Sngi U Blei, ha kaba ka Tyrsad High Secondary School ka la duh ïashim bynta.
Ha kane ka lympung yn wan shim bynta da ki skul kiba napoh kane ka district ha ki kyrdan ïalehkai Under-15 jong ki shynrang, katba ka Under-17 ha ka liang ki kynthei bad shynrang.
Ki kynhun kiba la wan shim bynta ha ka U-15 ki don 12 tylli ha kaba la pynïalehkai ha Madan Heh Mini Stadium kaba ha Mawlai Phudmuri, katba ha ka U-17 ki kynthei ki don 5 tylli bad ha ka U-17 ki shynrang ki don 14 tylli ha kaba la pynialehkai ha Third Ground, Polo.
Ka daw jong katei ka jingduh ïashim bynta ka skul Tyrsad ha ka kyrdan ïalehkai Under-15 ki shynrang ka dei na ka daw ba kam shym la lah ban poi ha ka por ba la buh namar ka jingdheng kali ha ki thaiñ Upper Shillong.
Ha ka jingshisha kane ka kynhun ka la dei ban ïakhun pyrshah ïa ka H.Elias HSS ha ka por 9:30 mynstep. Namar ka jingbym lah ban poi ha ka por ba la buh, ka la pynlong ïa ka H. Elias ban jop da ka walk over bad ka la ïoh rung syndon sha ka quarter final namar ïa kane ka lympung la pynlong ha ka dur jong ka knockout system.
Haba ïakren bad u nongthoh khubor u Bah Ridley Rangslang uba long u nonghikai ka skul Tyrsad, u la pynpaw ka jingsngew bynñiaw halor katei ka jingduh ïashim bynta ki khynnah wat la ki la mih dangstep na la shnong ban wan kiew sha nongbah Shillong. “Ha ka jingshisha ngi la mih naduh ka por 7 baje mynstep na la shnong, hynrei ynda poi ha ki thaiñ Upper Shillong ngi la ngat ha ka dheng kali bad ngim shym la lah ban poi shuh ha ka por kaba biang ha kane ka madan ïalehkai. Te kumta ngi la shah rai rem ha ka H. Elias.”
Kumta na liang une u nonghikai u la buh ka jingkyrpad ïa ka shlem treikam u DSO ba ha ki snem ban wan ba kan pyrkhat lem ïa ki skul kiba wan jngai na nongkyndong ban pynïalehkai noh ha ki por mynsngi ym shuh ha ki por mynstep khnang ba kan ym ktah ïa ki.
Ki kynhun ki ban rah ïa ka nam lahduh ha kitei ki kyrdan ïalehkai kin ïoh ïa ka lad ban mihkhmat sha ka State Level Subroto Cup Football Tournament 2024 ka ban long ha kane ka nongbah.
