D. H. Kharkongor
Ka don ka por ïa kiei kiei baroh. Wat uba rit bor ruh u don la ka ïa ba un pynilem ïa la ka jong ka bor phylla. Kiba bun kiba lah ithuh shai ba ka VPP kan jop donburom ïa kane ka Shillong Parliamentary Constituency. Hynrei ym poi pat ban shat jingmut ba kan jop syndon da haduh palat 3.71 Lak ‘votes’. Ka da long shisha ruh kumta bad katai ka Tura Parliamentary Constituency, ha kaba ka INC ka jop donburom da palat 1.50 Lak ‘votes’.
Te balei ba dang sngewphylla ïa kane ka jingrem noh jong ka NPP. Ka sengsaiñ pyrthei kaba u paid knup paid trap ne u paid kup shiliang sem shiliang u ñiew ba ka dei ka seng saiñ pyrthei kaba thik tang na ka bynta ka jingmyntoi ka jong uta u ‘High Level’. Ka seng saiñ pythei kaba da phai kyrpang pat ruh da ka lyngkdong ïa u papli u paid knup paid trap ba shida jinglong. Yn dang sngewphylla ruh lei ïa ka jingremnoh jong ka UDP, kaba kam pat de ba ka dei kata ka RDA. Kaba wat la ka dei ka seng saiñ pyrthei trai jylla pynban kam ïapher ei ei ruh em na ka NPP. Ka seng saiñ pyrthei trai kylla kaba kyrkhu kyrpang ïa kita ki ‘High Level’ kumba long ka NPP. Ka jingrem noh ka jong u Bah Vincent lem bad ka Agaha ka dei ruh ka jingangnud ka jong u paid jong ka jylla ban iohnoh, ha kane ka kynti kaba mynta,da ki MP kiba thymmai bad ym shuh da ki juh shi ki juh.
Ka don ka por ïa kiei kiei baroh ba kumta kane keiñ ka dei kata ka dak ka shin ba u paid knup paid trap lane u paid ba kyndoi ja kpoh u lah da ñiah hi shoin ïa kita ki ‘High Level’ bad ïa kane ka sorkar MDA ka jong ki ‘High Level’. Ki ‘High Level’ kiba sngew mat kumba baroh ka dohmet ne ka pasoh kaba lem bad ka khleiñ dud kin dei beit thik tang ki jong ki, katba u paid knup paid trap pat de u dei ban hun beitthik tang ïa ka shyieng ka shruh lem bad ka satar ka sajap ba la kyntait noh da ki (High Level). Ki ‘High Level’ kiba sngewmat kumba ki don hok wat ba kin pynkhien ne kin iuhroit, pyllein pyllein, la ïa kano kano ruh ka ‘Aiñ’. Ki ‘High Level’, kiba sngewmat kumba ki bat ma ki trait ïa u la kam jong kane ka sorkar MDA. Ki ‘High Level’ ïa kiba sngewmat kumba kane ka Sorkar MDA – II ka tieng thot thot ban pynthut bad ban pynsngewsih. Ki ‘High Level’ kiba ïaid pyneh shadem, ha ryng-kat kaba pyni sarong ïa la ka jong ka jingdon jingem. Ki ‘High Level’ kiba dei kawei na ki daw jong kane ka jingïai ïar bad ka ïai jylliew pynban jong kane ka kharai kaba pynïakhlad ïa uba pahuh na uba kyrduh.
Nga ngeit kiba bun kim pat klet ba ka BJP ka ju kob sarong ba ka Meghalya kannym lah ban ioh ïa ka Sorkar kaba khlem ma ka (BJP) lane ba yn nym lah ban thaw Sorkar khlem ka. Nga ngeit uba bun um pat klet ïa ka bynta ka jong u Himanta B Sarma mynba la suit la shor bad pynurlong ïa ka MDA-I. Te kumta kane mynta kam dei tang ka jingshah rem noh jong ka NPP, kaba dei hi ka BJP, hynrei ka dei ka jongshah rem noh jong ka MDA – II. Ka MDA – II, ba la suit la shor hi da ka BJP, ïa kaba la kyrshan pynskhem syndon pat de, sa shisien, da ka UDP. Ka UDP kaba ju kob sarong ba ka dei tang ma ka kata ka seng saiñ pythei trai jylla jong kane ka jylla Meghlaya ka jong ngi. Ka UDP kaba ym ïapher ei ei ruh em na u ‘khah’ uba ju dem ngon kat shaba beh ka lyer. Ka UDP kaba ju sliang khyllah kat haduh ba kan pdiang tohhoh ïa ka shiklat ka um kaba uba kumno kumno ruh u wan ban tyrwa ïa ka.
Te kumta lah ban ong ba kane mynta kam dei tang ka jingrem noh jong ka Ampareen bad ka Agatha hynrei ka dei ruh ka jingrem noh ka jong u Himanta B Sarma uba dei u Myntri Rangbahduh jong ka jylla Assam bad ruh u nongseng wat ïa kane ka sorkar MDA – II. Kumta ka jingshah rem jong ka MDA – II ka dei ruh ka jingshah rem noh jong ka NEDA, ba la khlieh hi da u Himanata B Sarma jong ka BJP bad uba dei ruh u Myntri Rangbah duh jong ka Assam. Kumta ngim dei ban sngewphylla ne sngewkyndit ïa kino kino ki jingkynthoh pyrshah ki jong u Himanta B Sarma ia kat ki bym shym la kyrshan met bad mynsiem ïa ka BJP ka jong u, kaba dei pat ruh ka seng saiñ pyrthei jong ka RSS. Ki jingkynthoh ki jong u, halor ka jingjop jong ka INC ïa ka Dhubri Parliamentary Constituency bad ïa ka Nagaon Parliamentary Constituency, ki dei ki jingpynshisha ba ka BJP ka dei ka sengsaiñpythei jong ki riewngeit Hindu, kiba angnud ïa kata ka’Bharat’ kaba kat kum ka saiñpyrkhat jong ka RSS. Ki jingkynthoh kiba pynpawshai ba u da shun thlong mluh thlong sying, nyngkong nyngshap, ïa ki Muslim.
Ki jingkynthoh ki jong Himanta B Sarma ba ka jingshah rem noh jong ka BJP, ha kane ka Lok Sabha Election – 2024, ha Nagaland, ha Mizoram bad ha Meghalaya, ka dei na ka daw jong ka jingdon bynta jong kawei ka kynhun niam ha ka saiñpyrthei. U da kren shai ruh ba ïa mynta ka lah dei ka niam ka jong ki riewlum kiba dei ki traijylla bad ruh ki heh paid jong kitei ki 3 (lai) ki jylla jong kane ka thaiñ shateilam mihngi. Na katei ka jingkynthoh ka jong u Himanta B Sarma jong ka BJP ba lah ban sngewthuhshai ba u kynthoh pyrshah ïa ka niam Khristan (Christianity) bad ïa ki riewngiet Khristan (Christianity). Ki jingkynthoh ki jong u Himanta B Sarma kiba pynpawshai ba ka BJP, kaba dei ka seng saiñ pyrthei jong ka RSS, kam sngewbha la ïa ki Muslim ne ïa ki Khristan. Ki jingkynthoh kiba pynpawshai ïa kaei kaba u ju pun, baroh shikatta, hapoh ka dohnud ka jong u. Ynda haba kumne mynta u bapli um lah set shuh ïa kaei kaba u pun ha la ka dohnud, kaba kat kum ka saiñ pykhat jong ka RSS. Ki jingkynthoh kiba jingpynshisha ba ka por ka dei ka nongbatai ïa kiei kiei kiba rieh bad ruh ba ka don ka por ïa kiei kiei baroh.
