Cairo, Jylliew:
Katkum ki khubor, la ong ba u Secretary of State jong ka US- u Antony Blinken u la leit biang sha Middle East na ka bynta ban iakren biang haba iadei bad ka thma jong ka Israel bad ki lehnoh Hamas hapoh Gaza. Hynrei la ong ba ki heh Myntri sorkar ka Israel ki la shu sngap jar-jar khlem pynphai ktien eiei halor katei ka jingthmu leit jurip jong utei u heh ka US ban iakren halor katei ka jingeh kaba ka Israel bad ka Hamas kim lah shuh ban ïasuk. Kumta, la ong ba kane ka long ka sien kaba phra (8) ia utei u heh ka US ban leit jurip sha Middle East.
naduh ba ka thma hapdeng ka Israel bad Hamas ka la jia. Hadien katei, la ong ba u Blinken un sdang shuwa da kaba leit hiar nyngkong ha Egypt bad hadien kata un sa pyndep ia ki kam ba sah Nangtei ter-ter.
Namar la ong ba la pynbeit ba u Blinken un leit ban shong jingialang ba shimet bad u President Abdel Fattah al-Sisi hapoh Cairo, uba long u nongkyrshan ba hajan jong ka US haba iadei bad ka jingthmu ban wanrah ia ka shongsuk shongsaiñ bad khamtam haba iadei bad kane ka thma Israel. Hadien kata pat la ong ba u Blinken un sa leit ban iakynduh markhmat bad u Myntri Rangbahduh ka Israel- u Benjamin Netanyahu hapoh Jerusalem.
Kumta la ong ba u Blinken u thmu ban leit jurip kyrpang sha kitei ki bynta jong ka Middle East ha kane ka sien naka bynta ban pynskhem ia ka jingiakren ïasuk hapdeng ka Israel bad ki heh ka kynhun lehnoh Hamas bad ban ialeh ban thaw-lad ban ioh ban pynkut noh ia katei ka thma kaba la neh slem mynta la bun bnai.
Hynrei, la ong ba na ka liang ka Hamas ruh kam pat shym la ai ktien ne pynphai ktien eiei haba iadei bad katei ka jingpyntip jong ka US ban iakren ïasuk noh bad ka Israel sa shisien ha kane ka kynti.
Ha kajuh ruh ka por, la ong ba uwei na ki heh jong ka Israel, ha ka Sngi U Blei u la phah ia ka shithi ieh-noh kam jong u kum u Myntri ka tnat ba dei khmih bad pyrkhat kam haba iadei bad katei ka thma jong ka Israel. Utei u heh ka Israel u dei u ba la tip kum u Benny Gantz bad u long uwei na ki heh nongialam ka Israel haba iadei bad ki jingthmu bad ki thong jong ka Israel halor ka thma ha Gaza.
