Jowai, Jylliew 10
Ka lympung ïalehkai ki khynnah skul ba la tip kum ka “District Level Inter School Subroto Cup 2024” ba la pynïaid da ka shlem treikam u District Sports Officer (DSO), West Jaiñtia Hills District ka la sdang ha ka Lah Sngi U Blei ha Kiang Nangbah Stadium, Jowai.
Ha kane ka lympung la wan ïashim bynta haduh 61 tylli ki skul bapher bapher jong kane ka district kynthup 28 tylli ha ka kyrdan Under-17 ki shynrang, 24 tylli ha ka kyrdan Under-15 ki shynrang bad 9 tylli ha ka kyrdan Under-17 ki kynthei.
Ha kane ka sngi sdang ka jingïakhun ka la long tang jong ka kyrdan Under-17 (Boys), ha kaba ka Mihmyntdu Secondary School ka la pynliem noh ïa ka Jaiñtia HS School da 3-0 kol, katba ka On and On English School Ummulong ka la pynliem da 7-0 kol ïa ka Che’s Star HS School.
Ka Laishnong HS School Nongbareh ka la pynliem ïa ka Marian Hill HS School lyngba ka tie-breaker da 5-4 kol. Ka St Dominic HS School ka la pynliem ïa ka Govt. Senior Basic RMSA School Bakur da 7-1 kol. Katba ka Seinraij HS School ka la jop da 2-1 kol ïa ka Khasi Pnar Sec School.
