Shillong, Jylliew 10
Ka Mount Hermon, Nongbsap S.S, Philarapsang Memorial SS bad ka Umphyrnai Presbyterian School ki la ïoh jingjop ha ka Under-17 (boys) ha kaba sdang jong ka District Level Inter School Subroto Cup Mukherjee Football Tournament 2024, katba ka O.M. Roy Memorial HSS ka la shah weng noh shi syndon na kane ka lympung.
Kat kum ka kyrwoh khubor na ki bor pynïaid jong ka shlem treikam u District Sports Officer (DSO) East Khasi Hill ha ka Lah Sngi U Blei, la ong ba ka jingshah weng noh ka O.M. Roy na kane ka lympung ka dei na ka daw ba ka la pynmih da u rangïalehkai ba la 21 snem ka rta.
La ong ba wat la ka OM Roy ka la ïoh jingjop ha kane ka jingïakhun pyrshah ïa ka Weiloi SS, hynrei ka la shah ujor ha ka liang pyrshah ba ka la pynmih da u rangïalehkai uba la 21 snem ka rta. Te kumta hadien ka jingbishar bniah ki bor pynïaid ki la lap ïa ka jingshisha bad ki la weng noh shi syndon na kane ka lympung. Namar kata, ka Weiloi ka la ïoh ei ïa ka jingjop.
Ha kiwei pat ki jingïakhun jong kane ka kyrdan, ka Mount Hermon ka la pynliem noh ïa ka B.K.Bajoria da 6-0 kol, ka Shillong College HSS ka la shah rem da 0-2 kol ha ka Nongbsap SS, ka Philarapsang Memorial SS ka la jop da 4-0 kol ïa ka Sacred Heart Boys, Umphyrnai Presbyterian ka la jop da 1-0 kol ïa ka Shillong Vidyalaya SS bad ka St. Anthony’s HSS ka la jop da 4-0 kol ïa ka M.D.C Multipurpose HSS.
Ha ka kyrdan ïalehkai Under-15, ka Nongbsap SS ka la pynliem noh ïa ka Rairiat A. UPS da 4-0 kol, ka St Anthony’s ka la jop da 2-1 kol ïa ka Tirot Sing School, ka O.M.Roy ka la pynjem khnap ïa ka Tlongumiam SS haduh 10-0 kol.
Haba ïadei bad ka U-17 ki kynthei, kan sdang naduh ka sngi Ba-ar ha kaba ka Pine Mount kan ïakhun pyrshah ïa ka Tyrsad HSS ha madan Third Ground, Polo ha ka por 3 baje janmiet.
