U Dr. Ricky A. J. Syngkon u dang long u ‘riew thymmai ha kam saiñ pyrthei (politic) bun ki bym pat ju bna ne ithuh ïa u, u la mih ïaleh MP ruh na ka party VPP kaba dang long ka party ba dang kham thymmai hapoh ka Shillong Parliamentary Constituency ne Meghalaya. Hynrei ka la long kaba kham phylla ba u la jop don burom eh da kaba tam haduh lai lak hynñiew phew wei hajar ïa u kyrtong ba long ba ar. Kane ka jingjop don burom jong u ka la pynkyndit lut ïa ki paidbah baroh hapoh Meghalaya ba un tam haduh kattei ki vote. Ka jingjop jong u Dr. Ricky ka la long kaba khampher da shisha. Ha shwa ka por thep vote por ba dang iaid bha ka jingïalap election nga la ioh ban kylli ïa kiba bun bah ki briew na poh ri Khasi – Jaiñtia kiba ju wan shim dawai bad nga ha Nongtoiñ kumjuh ruh na ki paidbah ka thaiñ Nongstoiñ ka jingkylli ka long iano phi kham pynleit jingmut ban thep vote ha kane ka election MP mynba bun bah ki briew ki jubab ba kin thep ha u Prah haba nga kylli mano u kyrtong ba ïaleh na u prah bun bah kiba jubab ym tip mano ba ïeng kyrtong na u Prah bun ki bym da tip hi ruh kata ka party VPP, khamtam ki Nongkyndong khambun ki paidbah nongkyndong ki tip tang ïa u Bah Ardent bad u Prah. Ha ka sngi thep vote bun bah ki la nion beit ha u Prah wat la kim tip ïa ka kyrteng u Dr. Ricky haduh ba un da jop don burom bad tam da lai lak hynñiew phew wei hajar. Kane kan ïai sah kum ka history u ba ïoh tam vote bun tam hapoh Meghalaya wat u Bah Hopingstone u riew khraw saiñ pyrthei um pat tam vote haduh kattei. Nga ai khublei don burom ïa u Dr. Ricky A. J. Syngkon ba un nang kiew ha ka kam saiñ pyrthei (politic) bad ba un long kum U (L) Hopingstone Lyngdoh ba un ïoh ïa ka jingieit jong u paidbah da ka jingtrei hok im hok ban long nongjop shilynter jingim lait na kata ka bamsap ha ka jingshakri paidbah. U Bah Hoping um ju kylla party u trei hok, um bamsap, um ju ai pisa por election, u jop beit lynter, kyrmen u Dr. Ricky un bud nuksa ïa u Bah Hoping.
Nga don ka jingngeit ba U Blei u la pynjop khnang ïa u Dr. Ricky ba un long u nongïasaid na ka bynta ka jingshah ban beiñ ba bun jaid ki khristan ha ri India kumba ngi la ju ïohi. U Dr. Ricky kumba ngi tip u dei u ba ïa kit ïa ka kam U Blei, nga duwai ba u Blei un nang ïai ïalam ïa u ha ka kam kum u shakri paidbah.
Dr. Boss. L. Marthong
U Nongpeit pyrman
