U MP bathymmai ka Congress na Tura, u Saleng A Sangma, u la kren shai ba ym don jaka shuh ïa u Myntri Rangbah barim, u Dr Mukul M Sangma, u Myntri sorkar barim, u Zenith M Sangma, ba kin wanphai sha kane ka seng. U Saleng u la jop kput pyrshah ïa ka kyrtong ka National People’s Party (NPP), Agatha K Sangma, kaba dei ruh ka para trai jong u Myntri Rangbah, u Conrad K Sangma, ha kane ka ilekshon MP kaba la dep katba u Zenith, uba la ïakhun na ka All India Trinamool Congress (AITC) u la wan ha ka kyrdan kaba lai. Ngi lah ban kdew ba naduh u snem 2013, ka jingïadei hapdeng u Saleng bad u Dr Mukul ka la sniew khamtam hadien ba u la shah pynduh tiket ban ïakhun na ka Congress ha ka ilekshon MLA kaba la long ha kato ka por. Hashwa kata, u Saleng u la long kum uwei na ki Myntri ha ka sorkar ba la ïalam da u Dr Mukul.
U Dr Mukul lem bad 11 ngut ki MLA Congress ki la mih noh na kane ka seng ha u snem 2021 hadien ba ka All India Congress Committee (AICC) ka la thung ïa u MP barim ka Shillong, u Bah Vincent H Pala, kum u President ka Meghalaya Pradesh Congress Committee (MPCC). U Saleng u la wanphai sha ka Congress hashwa ka ilekshon jong u snem 2023, bad dei tang ma u, uba la jop na ka seng Congress ha kato ka ilekshon na Rilum Garo. Hadien jong ka ilekshon MLA 2023, ka la don ka jingïakren ba u Dr Mukul bad ki saw ngut ki MLA ka AITC kin wanphai biang sha ka Congress. Hynrei haduh mynta, ka khlem pat urlong.
Ka Congress mynta ka sah sa saw ngut ki MLA hadien ba u Saleng u la shah jied kum u MP katba ka AITC ka dang neh san ngut ki MLA. Kumba ka long mynta, ka Congress ka lah ban duh noh ïa ka shuki Nongïalam jong ka Liang Pyrshah kaba bat da u MLA ka Mylliem, u Bah Ronnie V Lyngdoh, bad ïa kane ka shuki yn hap ban ai noh sha uwei na ki san ngut ki MLA ka AITC namar ka kham bun paid. Hynrei lada ka Congress ka jop biang na Gambegre, kaba dei ka konstitwensi MLA jong u Saleng, ka jingdon paid jong ka, kan kiew biang sha ka san ngut.
Watla kata ka jingïakren halor ka jingwanphai jong u Dr Mukul kam pat kut, na ka liang u Saleng pat u la kren shai ba un ym ailad ïa une u Myntri Rangbah barim ban wan pynïasoh biang sha ka Congress. Kane ka pyni shai ba ki don napdeng ki nongïalam ka Congress ki bym kwah shuh ïa u Dr Mukul ba un wan biang. Hynrei kumba ju long ka rukom, ka rai bakhatduh la ban pdiang ne kyntait ïano-ïano kan shong ha ka AICC kaba don ha New Delhi. Lada baroh ki MLA ka AITC kin rung sha ka Congress, ka jingbun paid ha Ïingdorbar Thawaiñ kan kiew sha ka 9 ngut. Tangba kam pat biang ban ïatynjuh bor bad ka liang synshar kaba don 46 ngut ki MLA, bad na kine, 28 ngut ki dei na ka seng National People’s Party (NPP). Na ka liang ka NPP kan pyrshang tyngeh ban jop na Gambegre khnang ban pynkiew ïa ka jingdon jong ki MLA sha ka 29 ngut ha ka Ïingdorbar.
Ngi ïohi ruh ba watla ka BJP ka khlem jop kput ha kane ka ilekshon MP, hynrei ka dang ïai bat ïa u lakam jong ka jingsynshar da kaba ïoh jingkyrshan na ki seng kiba la don lypa hapoh ka lama jong ka National Democratic Alliance (NDA). Ha ka jingai bhah Myntri, ka BJP ka khlem da kheiñ snep than ïa kine ki seng kiba kyrshan, bad wat ki kam kiba ki bat ruh ki long ki barit haba ïanujor bad ki kam kiba ïoh bat da ki MP ka BJP. Ngim tip haduh katno kine ki seng ba ïasynrop ha ka sorkar NDA ki kmen ne ki hun, bad ka por kan sa batai. Tangba ki seng kiba don ha ka INDIA Alliance ki ap beit kliaw lano ki seng kiba ïasynrop bad ka BJP kin ryngkang dieng kper khnang ba kan ïohlad ban thaw ïa ka sorkar bathymmai. Hynrei kumba ka long mynta, ki dak ki shin ki paw ba ka sorkar u Narendra Modi kan bteng haduh ba kut ka san snem.
