Shillong, Jylliew 11
Ka shlem treikam jong ka District Sports Officer (DSO) East Jaiñtia Hills ka la sdang ïa ka lympung ïalehkai District Level Inter School Subroto Mukherjee Cup Football Tournament 2024 ha ka Sngi Ba-ar ha madan Deinchynrum kaba ha Khliehriat.
Ha kane ka lympung la wan ïashim bynta da 14 tylli ki skul ha ka kyrdan ïalehkai Under-15, kumjuh 10 tylli ha ka kyrdan ïalehkai Under-17 ki kynthei bad 22 tylli ha ka kyrdan ïalehkai Under-17.
Ha kane ka sngi sdang la lah ban pynlong shwa tang ka jingïalehkai Under-17 jong shynrang ha kaba ka Sham Sham SS ka la pynliem noh ïa ka Dkhiah Presbyterian SS lyngba ka tie-breaker da 4-2 kol.
Ka Holy Trinity SS ka la jop da 6-4 kol ïa ka Rymbai Govt. SS. U Wahshanlem Suja u la ïoh ïa ka hat-trick na ka bynta ka Holy Trinity da kaba thep saw kol ha ka minit kaba 7, 12, 17 & 48, katba ïa ki shi kol la thep da u Fairly Donalki War (30+1) bad u Banshankupar Dkhar (44). Na ka liang ka Rymbai ka la thep mar ar kol da u Ba-Aijingkmen Suchen (28 & 58) bad u Deogracias Bareh (45 & 48).
Ka Khliehriat HSS ka la jop da ka walk over hadien ba ka K.B Memorial SS kam shym la lah ban poi ha ka por ba la buh. Ka Chiehruphi SS ka la pynliem noh ïa ka Ïeng Swer Memorial SS da 2-1 kol. Ïa kine la thep da u Pynïarbha (3) bad u Evanmidao Lamare (16), katba na ka Ïeng Swer la thep da u Dawanki Dkhar (18).
Ka Devine Word SS ka la pynliem noh ïa ka Musniang SS lyngba ki ar kol ba la thep da u Mebanker Sumer ha ka minit kaba 43 bad u Adarch Singh (60+2).
