Shillong, Jylliew 11
U Mansukh Mandaviya, uba la bat kham ha shwa kum u Myntri ka tnat ka koit ka khiah ha ka por ba khie ka khlam CO-VID-19 ha u 2021, u la shah thung mynta kum u Myntri ka tnat ïalehkai jong ka Sorkar Pdeng. U la ïoh ban mih bujli ha ka jaka u Anurag Thakur hapoh ka kynhun myntri jong u Myntri Rangbahduh ka ri u Narendra Modi.
U Mandaviya uba la 52 snem ka rta u la ïoh jingjop ha ka ilekshon MP Lok Sabha na Porbandar kaba ha Gujarat da kaba u la lah ban pynliem noh ïa u kyrtong ka seng Congress u Lalit Vasoya da 3.83 lak vote.
Nalor jong ka tnat ïalehkai, u Mandaviya u la shah pynkhamti ruh na ka bynta ka ministry of chemicals and fertilisers hapoh kane ka kynhun myntri kaba thymmai.
Kumjuh ka Raksha Khadse, kaba la bat lai sien kum u MP ka seng BJP na Raver kaba ha Maharash-tra, ka la shah thung kum u Minister of State (Sports) kaba hap hapoh jong u Mandaviya.
Ka Raksha kaba dang 37 snem ka rta kaba dei ka pyrsa kurim jong u Eknath Khadse uba long u nongïa -lam ka seng NCP hapoh ka jingpynïaid u Sharad Pawar uba la rai ban leit ïasoh biang sha ka BJP.
Ka Raksha ka la ïoh ïa ka jingjop ha ka ilekshon Lok Sabha jong u snem 2024 ha kaba ka la tam kumba 3 lak vote, hadien ba pynliem noh ïa u Shriram Patil na ka NCP. U kurim ka Raksha, u Nikhil Khadse, u la khlad noh ha u snem 2013.
U Mandaviya u la shimti ban khmih ïa ka tnat ka koit ka khiah hapoh ka jingwan lynshop ka khlam COVID-19 ha u 2021, na ka bynta ban mih bujli ha ka jaka u Dr Harsh Vardhan. Kane ka tnat treikam jong u ha kito ki por ka la bunkam ha ka ban pynbiang ïa ki tyndong lyer oxygen bad ki dawai lem bad ka prokram ai tika ha ka por ka jingwan syllad katei ka khlam ha ka wat kaba ar. Ha kane ka jingbate kam kaba dangshen jong kane ka sorkar kaba thymmai, ia ka tnat ka koit ka khiah la pynkhamti ha u JP Nadda.
Ha kane ka jingïaid lynti ha ka sien kaba nyngkong kum u MP ka Lok Sabha, u Mandaviya ïa uba la kha ha ka 1 tarik u Jylliew jong u snem 1972 ha Bhavnagar, u la long kum u MP ka Rajya Sabha na Gujarat bad u la jop kum u MLA na Palitana assembly jong ka Bhavnagar district ha u 2002.
U Anurag Thakur, u la long uwei napdeng ki 37 ngut ki Myntri kiba la shah weng noh na kane ka sorkar kaba lai jong u Modi. U Thakur u la bat ïa ka kam kum u Myntri ka tnat ïalehkai la kumba lai snem naduh ba u la shimti ha ka 7 tarik u Naitung jong u snem 2021.
