Shillong, Jylliew 12
Ka lympung ïalehkai EKH District Level Inter School Subroto Cup Mukherjee Football Tournament 2024 ka la nangjam shaphrang ha kaba ka Assam Rifles Public School, Umphyrnai Presbyterian SS, Umpohliew Jingtip HSS bad ka Tyrsad HSS ki la jam sha ka final ha kaba kin ïaknieh ïa ka nam lahduh ha ka Sngi Thohdieng.
Ha ka jingïakhun semi final jong ka Under-17 (Boys) ba la pynlong da ka shlem treikam u District Sports Officer (DSO) East Khasi Hill ha ka Sngi Balang ha Third Ground Polo, ka Assam Rifles Public School kaba la bat ïa ka nam lahduh mynshem snem ka la lah ban pynliem noh ïa ka Nongbsap da 8-0 kol.
U Rodrygo Sympli u la ïoh ïa ka hat-trick hadien ba ïoh thep kol ha ka minit kaba 32,37 & 41, katba ïa ki shi kol la thep da u Phermanbha Lyngdoh (8), Robindor Kyrsain (39), Adrian M. Sawian (57), Thoudam Dilson Singh (60) bad ïa kawei pat la ïarap pynthep da u rangïalehkai Nongbsap u Pyntngen Malngiang (8).
Ka H.Elias M. HSS ka la shah rem noh ha ka Umphyrnai Presbyterian SS da 4-0 kol. U Ricky Kharkongor u la thep ar kol ha ka minit kaba 52 & 60, katba ïa ki shi kol la thep da u Kyrshanskhem Kshiar (42) bad u Banlamkupar Rynjah (60+2).
Ha ka semi final jong ka Under-17 (Girls), ka Umpohliew Jingtip ka la pynliem noh ïa ka H.Elias M. HSS lyngba ka tie-breaker da 6-5 kol. Ha kane ka jingïakhun baroh ar ki kynhun ki la ïoh ban thep mar shi kol ha kaba ka H. Elias ka la ïoh ban pynkhih jar nyngkong lyngba ka Arivaca Basaiamoit ha ka minit kaba 7, hynrei ka Umpohliew ka la lah ban pynphai kylla lyngba u Balahunlyngdoh Mawphlang (25).
Katba ka Tyrsad SS ka la pynliem noh ïa ka Ïewrynghep SS lyngba ka tie-breaker da 3-2 kol. Hapdeng kane ka jingïakhun kine ki kynhun ki la ïakhaid mar shi kol ha kaba ka Tyrsad ka la pynkhih jar nyngkong lyngba ka Ibashembha Khongsit (47) bad ka Ïewrynghep ka la pynphai kylla lyngba ka Larihun Sonhgthiang (55).
Haba phai sha ka semi final jong ka Under-15 (Boys), ka Umphyrnai Presbyterian SS ka la pynliem noh ïa ka Sacred Heart Boys HSS lyngba ka tie-breaker da 3-2 kol. Hapdeng kane ka jingïakhun kine ki kynhun ki la ïakhaid mar 2-2 kol. Na ka Umphyrnai la thep da u Bankitbok Mylliemngap (27) bad u Banpyn-shngaiñ Wankhar (67), katba na ka Sacred Heart la thep da u Reynold Kurbah (69) bad u Poul Kurbah (63).
