Jordan, Jylliew:
Katba ka thma jong ka Israel bad ki lehnoh Hamas hapoh Gaza ka dang jur bad iai bteng, la ong ba u Secretary of State jong ka US- u Antony Blinken ha ka Sngi Ba-ar u la leit ban iakynduh bad ki heh na Jordan hadien ba ka Middle East ka la khot ïa u ban leit shong jingialang kyrkieh naka bynta ban leh eiei noh haba iadei bad ka thma jong ka Israel bad ki Hamas, ka bym long shuh ban pynslem ne ban dang iai bteng biang kumjuh.
La ong ba kane ka la long ka sien kaba 8 ïa utei u heh ka US ban leit jurip sha Middle East naduh ba la sdang ka thma Israel ha ka 7 tarik u Risaw jong u snem 2023 ba la leit.
Kumta ruh la ong ba utei u nongialam u la kyntu kyrpang ïa ki heh ka kynhun lehnoh Hamas ba kin pdiang noh ïa katei ka jingiakren ïasuk bad ban pynkut noh ïa ka thma jong ka Israel pyrshah ïa katei ka kynhun kaba synshar hi ïa ka nongbah Gaza da ki phew snem.
Hapdeng katei ka jingleit jurip jong u, u Blinken u la iathuh ba u Myntri Rangbahduh ka Israel- u Benjamin Netanyahu u la pdiang ïa katei ka jingtyrwa ban sangeh thma kumba 1 bnai shiteng, ïa kaba la ai jingkyrshan bad mynjur lang ruh da ka UN Security Council.
Kumta, u Blinken u la ong ba baroh ki tnat bad kumjuh ruh ka Israel, ki la mynjur lut halor kane hynrei dei sa tang ka Hamas ka bym pat ai ktien bad namarkata u la ong ba lada ka Hamas kam treh ban mynjur ne kohnguh lang ha kane ka sien, dei ka Hamas marwei hi ka ban hap ban shim ka jingkit khlieh bad dei ma ka hi ka ban shah ktah jur hadien lada kitei ki tnat bad ki ri kim treh shuh ban dang tuklar lang haba iadei bad kane ka bynta.
Hadien kata, la ong ba u Blinken u la leit hiar pat sa sha ka ri ba marjan sha Jordan ban leit shong jingialang ha katei ka ri haba iadei bad ka jinglong- jingman bad ka jingktah jur jong ka thma ka Israel hapoh Gaza ha ryngkat ka jingiadon lang jong ki nongialam na ki ri Arab bad kiba don jingthmu ruh ban leh eiei naka bynta ki paidbah nongshong shnong ka Gaza Strip khamtam haba iadei bad ka bam- ka dih bad ka jinglong- jingman jongki.
Namar la ong ba ka jingleit hiar thma jong ka Israel sha Gaza, ka la pynkylla phetwir ïa ki paidbah nongshong shong ka Gaza Strip baroh kawei bad ka la wanrah ruh ïa ka jingkyrduh bam kaba la ktah ïa palat 2.4 Million ngut ki paid nongshong shnong ba lui-lui katei ka nongbah Gaza bad kim shym ioh shuh wat tang ka umdih kaba khuid ba kin dih.
