Sudan, Jylliew:
Ka tnat International Organization for Migration ha ka Sngi Ba-ar ka la pyntip ba katkum ka kaiphod ba la ioh ban lum da katei ka tnat, la shem ba ki don palat 10 Million ngut ki paidbah kiba la sakma na ka thma kaba la jia ha katei ka ri Sudan bad kaba la jia ha u snem 2023.
La ong ba naduh ba katei ka thma ka la sdang ha u Iaiong jong u snem 2023 hapdeng ki shipai ka Sudan bad ka Rapid Support Forces, ki don kumba 7.26 Million ngut kiba la phet bad ieh noh syndon ïa ki iing- ki sem jongki, ha kaba 2.83 Million ngut pat ki dei kiba la phet bad sakma lypa naduh ki por ba mih ki jingiakynad hashwa jong katei ka thma.
Kane ka long hadien ba ka United Nations ka la maham tyngeh ïa ka Sudan ba ka lah ban mad ïa ka jingeh kaba khraw namar ki paidbah jongka ki la kylla phetwir bad poi sakma lut hadien ba katei ka thma ka la neh bad kam i-don jingkyrmen shuh ïa ki paidbah ba kin ioh shongsuk- shong saiñ kumba long ha kiwei pat ki ri.
