Shillong, Jylliew 12
Ka All India Football Federation (AIFF) ka la phah ïa ka jingujor sha u match commissioner na ka bynta ban bishar bniah halor ka jingshah thep ka kol ba ar ha ka Qatar ha ka lympung ïalehkai jong ka FIFA World Cup qualifier kaba la long ha Doha.
Kat kum ki khubor la ong ba kane ka synjuk ka la dep ban bishar bniah ïa katei ka jingshah thep kol wat la u rephri ka South Korea u Kim Woo-Sung u la ïohi shynna ba ka bol ka la long shabar ha shwa ban kut ka jingïalehkai.
“Ha jingshisha kum kine kim dei shuh ban dang jia ha ka jingïalehkai phutbol,” la pynpaw u coach ka kynhun u Igor Stimac kaba la mih kane ka kynrum-kynram ha ka World Cup qualifier
“Ngi la dep ban buh ka jingujor ha u match commissioner bad ban pynlong ka jingtohkit halor katei ka jingjia,” la pynpaw ki dkhot ka AIFF.
Kane ka jingjia ka la jia ha ka jingïalehkai kaba la long ha Jassim Bin Hamad Stadium, ha kaba ka India ka la shah rem noh da 1-2 kol ha ka miet jong ka sngi Ba-ar bad pynlong syndon ban duh noh ïa ka lad ban jam sha ka wat balai jong ka FIFA World Cup Qualifiers ban ïaknieh rung sha u 2026.
Na ka liang u match commissioner, u Hamed Momeni uba na Iran u hap ban don ka jingkitkhlieh ban bishar bniah ïa ki kyndon kat kum ka FIFA.
Katei ka jingjia ka la wan ha ka minit kaba 73 ha kaba u Abdullah Alahrak u la shut ïa ka free-kick ha kaba ka la pynlong ia u Yousef Ayem ban pynshang thep da ka khlieh, hynrei na ka liang u kapten bad uba long u rangapkol jong ka India u Gurpreet Singh Sandhu u la ïaleh ban pyllait na ka jingshah thep ha ka bol ka la mih shabar, hynrei u Hashmi Hussein u la kdat ïa ka bol bad ailad ïa u Aymen ban thep kol.
