Shillong, Jylliew 12
U Jose Molina un wanphai sha ka nongbah Kolkata na ka bynta ban wan shimti kum u manager ba thymmai ka Mohun Bagan Super Giant.
Une u coach ba la 53 snem ka rta un mih bujli ha ka jaka u coach na Spain u Antonio Lopez Habas na ka bynta kane kynhun kaba la bat teng ïa ka nam lahduh ha ka Indian Super League.
“Nga sngewkmen eh ban ïadon bynta bad ka Mohun Bagan Super Giant, kaba long ka klob kaba la rim bha. Nga kyrmen ba ngin lah ban wanrah jingjop ïa kane ka klob bad kumjuh na ka bynta ki paidbah nongkyrshan,” la ong u Molina, uba long u rangapkol barim ka Spain, ha ka kyrwoh ba la pyllait da kane ka klob.
Wat la ki bor pynïaid ka Mohun Bagan SG kim pat shym la pynpaw ïa ki jingtip kiba bniah halor kane ka jingthung ïa utei u manager, hynrei la sngewthuh ba u Molina u la soi ïa ka kontrak kaba shi snem bad kane ka lahduh jong ka ISL Shield.
Kham ha shwa u Molina u la ïadon bynta bad ka ATK tang shi aïom bad uba la lah ban pynurlong ban rah nam lahduh ha ka ISL jong u snem 2016. Ha katei ka por u la ïoh ban mih bujli ha ka jaka u Habas ïa kane ka klob.
Lyngba ka jinglah ban rah ïa ka nam lahduh ha ka ISL Shield, ka Bagan ka la ïoh rung sha ka AFC Champions League Stage 2 bad na ka liang ki bor ba dei khmih ïa kane ka kynhun ki la khmih lynti ban dang pynkhaiñ ïa kane ka kynhun ha katei ka lympung.
Kham ha shwa u Molina u la ïadon bynta ha ka Real Federacion Espanyola de Futbol kaba long ka Synjuk ïalehkai ha Spain na ka bynta saw snem tad haduh ba u la mih noh ha u Nohprah jong u 2022 hadien ba ka Spain ka la kut noh ka jingïaid lynti ha ka World Cup ha Qatar.
Ha kawei pat ka liang ka East Bengal FC ha ka Sngi Ba-ar ka pynbna ba ka la soi biang ïa u rangïalehkai shapdeng na Spain u Saul Crespo na ka bynta ka kontrak ar snem bad kane kan kut haduh ka aïom ïalehkai 2025-26.
U Crespo u dei u rangïalehkai uba la lah ban thep 7 kol ha ka aïom kaba nyngkong jong ka ISL bad u la ïoh ruh ïa ka nam Man of the Match ha ka por ba ka East Bengal ka rah ïa ka nam lahduh ha ka Kalinga Super Cup bad ïoh rung sha ka ACL stage 2 qualifiers.
“U Saul u long u rangïalehka uba kongsan. U la long u rangïalehkai uba kynsai na ka bynta ban pynurlong ïa ka kynhun ban kynjoh sha ka thong. Lada u Saul u lah ban ïalehkai bha ha ka bynta kaba shapdeng, ki rangïalehkai sha ka bynta kaba shakhmat kin ym don jingeh ban pynurlong ïa kabu ksiar,” la ong u coach ka East Bengal u Carles Cuadrat.
