Shillong, Jylliew 12
Ka jinglah ban ïalehkai bha u Suryakumar Yadav bad u Shivam Dube ka la biang pura ïa ka India ban pynliem ïa ka United States da 7 wiket ha ka T20 World Cup kaba la long ha ka Sngi Balang ha New York.
Ha kane ka jingïakhun ka India ka la lah ban kynjoh sha ka thong da kaba ïoh 111 run bad ban ïoh rung sha ka Super Eight hadien ba ka la lah ban jam sha ka kyrdan ba hakhlieh jong ka Group-A.
Wat la u Saurabh Netravalkar u la lah ban pynkhyllem dang kloi ïa u Virat Kohli bad u Rohit Sharma, katba u Ali Khan ïa u Rishabh Pant, hynrei hadien ka jingwan ban shimti da u Suryakumar Yadav bad u Shivam Dube ki bym shym la shah pynkhyllem, ka la pynlong ïa ka India ban kynjoh sha ka thong. Ha kane ka jingïakhun u Suryakumar u la ïoh ban khyrwit ïa ka shiteng spah run (50) na ki 49 bol bad u Dube u la ïoh 31 run na ki 35 bol.
Kham ha shwa ka USA kaba la kam trai ban tied nyngkong, ka la buh ïa ka thong da kaba ïoh 110 run bad shah pynhap 8 wiket ha ki 20 over. U Nitish Kumar u la ïoh ban tied kham bun da kaba kamai 27 run na ki 23 bol, katba u Steven Tailor u la ïoh 14 run na ki 30 bol. Katba u Arshdeep Singh u la ïoh ban pynhap 4 wiket, kumjuh u Hardik Pandya u la khur 2 wiket, katba ïa ka shi wiket la khur da u Axar Patel.
Lyngba kane ka jingjop ka India ka dangsah sa kawei ka jingïakhun kaba khatduh pyrshah ïa ka Canada ka ban long ha ka 15 tarik, katba ka USA ka donkam ban jop ïa ka Ireland ka ban long ha ka 14 tarik khnang ban ïoh rung sha ka Super Eight.
