Jowai, Jylliew 12
Ban pynkhreh ïa ka lympung ïalehkai 6th Meghalaya Games 2025 kaba la thmu ban pynlong ban West Jaiñtia Hills, ka kynhun ki nongmih khmat na ka Meghalaya State Olympic Association (MSOA) bad ki synjuk ïalehkai bapher bapher ki la wan ban jied ïa ki jaka ïalehkai ha Jowai bad ha Wahïajer.
Ha kane ka jingwan jied ïa ki jaka ïalehkai ha ka Sngi Ba-ar, la ïalam da u Working President u Bah John F. Kharshiïing bad u General Secretary u Bah L Pariat, ki Assistant Director ka tnad ïalehkai kata u Païa War Nongbri lem bad u Bah Khroobok Passah, ki nongïalam jong ki synjuk bapher bapher lait noh ki nongïalam na ka synjuk ïalehkai jong ka Boxing.
Ha kane ka jingwan jurip bad ban pynthikna ïa ki jaka ïalehkai, ka MSOA bad ki synjuk ki la leit kylleng ki jaka kynthup ïa ka Kiang Nangbah Government College kaba la jied na ka bynta ban pynlong ïa ka Swimming, Thomas Jones Synod College, Tpep Pale, Jowai Presbyterian Higher Secondary School, Ladthadlaboh bad Wahïajer Sports Complex.
U Bah John haba pynpaw ha ki lad pathai khubor, u la ong ba ki don haduh 24 tylli ki synjuk kiba la wan ban jurip ïa ki jaka ïalehkai bad kine ki kynthup ïa ka Archery, Athletics, Arm Wrestling, Badminton, Basket-ball, Cycling, Football, Golf, Gymnastic, Judo, Karate, Swimming Shooting, Softball, Sports Climbing & Mountaineering, Table Tennis, Tennis, Taekwando, Volleyball, Weightlifting, Wrestling, Wushu, Muay Thai bad Kho Kho.
U la ïathuh ba ïa mynta, na ka liang ka Sorkar lyngba ka tnat ïalehkai, ka don hapdeng ka thong jong ka jingpynkhreh bad ban pynbit pynbiang ïa ki jaka ban pynïalehkai bad mynta ka sngi la pynthikna ïa ki madan bad ki jaka ïalehkai bad ki jaka sah bad kiwei kiwei ki kam kiba ïadei ban pynlong ïa ki jingïalehkai.
U la ong ba ka Jowai ka bun ïa ki jaka ïalehkai bad kane ka ai jingkyrmen bad kan pynim ïa ka district ban pynshlur ïa ki khynnah ban ïalehkai bad ban sei ïa ki nongïalehkai kiba kynsai kum ka jingpyrshang ka jong ngi bad ka ban long ruh kum ka jingpynkhreh ïa ka National Games 2026.
U Bah Finely, u la ong ba ka Jowai ka don bun ki hall bad ki jaka ïalehkai bad kam don jingeh ïa ka sorkar ban pynlut ha ki jingtei bad ban pynbiang ïa ki tiar tar ïalehkai.
U la pynpaw ruh ïa ka jingsngewnguh ïa baroh ki state association kiba shim khia ban wan ïadon lang ban jied ïa ki jaka ïalehkai. U la ong kaba sah ka long sa tang ha ka Sorkar ba kan shim noh ïa ka sienjam ban sdang noh ban pynbiang ïa ki jingdonkam ban pynkhreh ïa ka Meghalaya Games ka ban wan bad ban pynbna ïa ka tarik.
Na ka liang u DSO u Bah Khroobok u la ong ba ïa ka Swimming la jied ban pynlong ha Kiang Nangbah Government College bad ka Shooting Long Range la jied ha madan Tpep Pale.
Ka jylla ka don sa katto katne bnai ban tei ïa ki jingtei ka sorkar ka ban sdang shen ban pynbiang ïa ki jongdonkam ha ka ban tei ne shna ïa baroh ki jaka ïalehkai.
