Jowai, Jylliew 13
Ka Jowai Public School, St. Dominic HS School, Rising Hills Sec School Mowtyrshiah, Police Public SS bad Modern SS ki la rung sha ka pre-quarter final jong ka kyrdan Under-15 (Boys) jong ka lympung ïalehkai District Level Inter School Subroto Mukherjee Cup Football Tournament 2024.
Ïa kane ka lympung ïalehkai la pynïaid da ka shlem treikam u District Sports Officer (DSO), West Jaiñtia Hills District ha Kiang Nangbah Stadium kaba don ha Ladthadlaboh, Jowai.
Haba phai sha ka jingïalehkai, ka Jowai Public School ka la pynliem noh ïa ka Che’s Star HS School da 7-0 kol. Ka St. Dominic HS School ka la pynliem ïa ka Ummulong Presbyterian HSS da 2-0 kol. Ka Rising Hills SS, Mowtyrshiah ka la pynliem ïa ka Jowai Govt. UP RMSA School da 1-0 kol.
Ka Police Public Sec School ka la pynliem ïa ka Seinraij HS School da 3-1 kol lyngba ka tie-breaker. Katba ka Modern SS ka la pynliem ïa ka All Saint Diocesan SS da 4-2 lyngba ka tie-breaker.
Ha ka kyrdan ïalehkai Under- 17 (Boys) ka la jam sha ka pre-quarter final ha kaba kan sdang naduh ka sngi Thohdieng hapdeng ka North Liberty HSS pyrshah ïa ka Mihmyntdu SS, ka On and On English SS ïa ka Laishnong HSS. Ka St. Dominic HSS pyrshah ïa ka Seinraij HSS. Ka Sawlyngdoh HSS ïa ka Mihmyntdu RC EVE SS bad ka Ummulong Presbyterian HSS pyrshah ïa ka Kiang Nangbah Govt. HSS.
