Shillong, Jylliew 13
Ka Germany kan sdang ïa ka jingïalehkai kaba nyngkong eh jong ka Group-A ha ka Euro 2024 pyrshah ïa ka Scotland ha ka miet synñia jong ka Sngi Saitjaiñ ha Allianz Arena stadium kaba ha Munich. Kane ka long ruh ka jingïai ap khmih lynti ki paidbah nongkyrshan ban sakhi ïa kane ka jingïakhun.
Ka Germany kaba la long kum ka lahduh haduh saw tylli ki lympung ïalehkai World Cup bad lai sien ha ka European Championships, hynrei kane ka kynhun ka la don hapdeng ka jingeh ban kynjoh biang sha ka thong naduh ba ka la rah ïa ka nam jop ha ka World Cup 2014 kaba la long ha Brazil.
Kane ka kynhun ka la shah rem noh tang ha ka jingïalehkai group ha ki ar tylli ki lympung ïalehkai World Cup, bad kane ka pyni ïa ka jinghiar ha ki 80 snem bad ha ka Euro 2020 ka la poi tang ka pre-quarter final.
Da ka jingpynlong ïa kane ka lympung ïalehkai ha la ïing, ka lah ban pynhun mynsiem ïa ki paidbah nongkyrshan ka Germany, kaba la ïai ap khmih lynti ban rah biang ïa ka nam lahduh.
Wat la kam shym la lah ban ïalehkai bha ha ka World Cup 2022, hynrei hadien kane ka la mad ïa ka jingshah rem ha la ïing da 4-1 kol ha ka Japan ha u Nailur. Kumta da ka jingwanrah ïa u coach bathymmai ka (Germany) dang don jingkyrmen ban kynjoh sha ka thong.
U Julian Nagelsmann uba la shimti kum u coach ïa ka Germany ha u Risaw 2023, u la kren da kaba shai ba u thrang ban ïoh ïa ka jingjop ha kane ka lympung. “Ngi kwah ban khur ïa ka jingjop.”
“Ka long kumjuh kumba long ha kiwei ki lympung, hynrei ngim shym la lah ban pynurlong bad mynta ka kynti ngi dei ban pynurlong na ka bynta ban rah ïa ka nam lahduh ha Europe. Ngin ïakynduh ïa ki jingeh ha kane ka lympung, hynrei ngi dei ban pynurlong ïa ki kabu ksiar,” la bynrap u Nagelsmann.
Hapoh kane ka kynhun ïalehkai ka jong u la kynthup lang ïa ki rangïalehkai kiba dangkhynnah kynthup ïa u Jamal Musiala, u Florian Wirtz uba la don bynta bad ka Bayer Leverkusen kaba long ka lahduh jong ka Bundesliga, kum-juh ki rangïalehkai kiba kham rangbah kiba la ïadon bynta ban khur jingjop ha ka World Cup 2014 kum u Manuel Neuer, Thomas Mueller bad u Toni Kroos.
