Shillong, Jylliew 13
Ka lympung ïalehkai District Level Inter School Subroto Mukherjee Cup Football Tournament 2024 ba la pynïaid da ka shlem treikam jong ka District Sports Officer (DSO) East Jaiñtia Hills ka la nangjam shaphang ha ka sngi kaba lai.
Ha ka jingïalehkai U-17 ki shynrang kaba la long ha ka sngi Thohdieng ha madan Deinchynrum kaba ha Khliehriat, ka Wapung HS ka la pynliem noh ïa ka Rymbai Pohskur SS da 2-0 kol. Kane ka la wan lyngba ki kol ba la thep a u Promi Tariang (25) bad u Vishal Nongpluh.
Ka Little Star SS ka la jop da 3-0 kol ïa ka Latyrke SS. U Mihsalan Suiam u la ïoh ban thep ar kol ha ka minit kaba 8 & 10 bad ïa kawei pat la thep da u Salangki Chyrmang ha ka minit kaba 50.
Ka Lotus SS ka la pynliem noh ïa ka Khliehriat Presbyterian HSS da 2-0 kol. Ïa kine la thep da u Rimon Lyngdoh (13) bad u Timing Lyngoh (28). Ka Seinraij ka la shah rem noh ha ka Byndihati SS da 3-0 kol. U Luckystar Lapasam u la thep ar kol ha ka minit kaba 46 & 51, katba u Firstwell Marweiñ u la thep kham hashwa ha ka minit kaba 42.
Ka Sutnga SS ka la pynliem noh ïa ka Step By Step lyngba ka tie-breaker da 3-2 kol. Ha ka jingïakhun kine ki kynhun ki la ïakhaid mar shi kol, ha kaba ka Step By Step ka la pynkhih jar nyngkong lyngba u Banïakyrshan Rymbai (8), katba u Obalajied Sutnga (25) u la lah ban pynphai na ka bynta ka Sutnga.
