Aizawl, Jylliew:
U Myntri Rangbah jong ka Mizoram u Lalduhoma ha ka Sngi Ba-ar u la kyntu ïa ki samla jong ka jylla ba ki la dei ban long kiba la pynkhreh ïalade na ka bynta ban leit trei shabar ri, da kaba pynshisha ba ka jingkyrduh pisa jong ka ri ka la long ka daw ban ïakynduh jingeh na ka jingkyrduh kam.
Ha ka jingai jingkren ha ka jingplie ïa ka Zofa Agency, kaba dei ka kynhun ki riewshimet ba la ithuh bad pdiang da ka Union Ministry of External Affairs ha Aizawl, u Myntri Rangbah u la ong ba ki nongwad kam ki la dei ban pynleit jingmut na ka bynta ban kyntiew ïa ki sap bad ban ym lehraiñ ban trei ha kano kano ka kam wat lada duna ka jingsiew lada trei shabar ri. “Ka sorkar jong ngi ka la trei na ka bynta ban wanrah ïa ki lad ki lynti ban phah ïa ki samla Mizo ba kin trei sha Taiwan, the United Kingdom bad sha ki bynta ba shaphang Shathie jong ka ri India,” la ong u Myntri Rangbah.
Kum shi bynta ban ïakhun tyngeh halor ka jingkyrduh kam bad ban pyntikna ba ki samla ka jylla kin ïoh ïa ki kam ki jam kiba shabar ka jylla, ïa ka Mizoram Private Placement Agencies (Regulation) Act la dep ban pdiang ha u snem 2015, u la ong. Hapoh ka jingtreikam jong kane ka aiñ, ki la don kumba 27 tylli ki kynhun jong ki riewshimet kiba la ïoh ïa ki License na ka bynta ban phah ïa ki samla khlem kam khlem jam ba kin trei ïa ki kam jong ki shabar jong ka jylla, u la ong.
Ha kaba ïadei bad kane, la ong ba ïa ki License jong kum kine ki kynhun la pynsangeh treikam ha une u snem ha ka ban phah ïa ki samla shabar ri hapoh ka jingtreikam jong kane ka aiñ, la ong u Myntri Rangbah.
U Lalduhoma u la ong ba ki la don kumba 29 ngut ki briew kiba la shahkem halor ka jingphah jong ki ïa ki samla khlem kam khlem jam shabar ri. Ki pulit ki la ïathuh ba ki la don palat 30 ngut ki samla Mizo kiba la shah pyllait im na United Arab Emirates (UAE) bad Oman dang shen. Ka jingpyntreikam mynta ka dang ïaid shakhmat na ka bynta ban ïoh pyllait im sa ïa lai ngut ki kynthei Mizo kiba dang sahkut ha Syria, la ïathuh shuh shuh ki pulit.
