Shillong, Jylliew 13
U MDC ka UDP na Sohra Constituency bad President ka UDP East Khasi Hills District, Bah Titosstarwell Chyne, u la pynpaw ba ka seng ka pdiang ïa kaei kaba ki paidbah ki rai haba ki la kyntait ïa u kyrtong ka UDP ba la kyrshan da ka HSPDP bad jied ïa u kyrtong ka VPP u Dr Ricky AJ Syngkon.
Haba ïakren bad u Bah Titos u la ong, wat la ka UDP ka la shah rem ha kane ka ilekshon MP Lok Sabha hynrei kan dang trei ïa la ka jong ka bynta namar haduh mynta ka seng ka don ïa ki MLA bad MDC namar ha man ka ilekshon ka don beit ka jingïapher.
“Ngi kitbok ïa u Bah Ricky Syngkon, u MP ba dang shah jied thymmai na ka seng VPP ba un pyndep hok ïa ka kamram kumba u la kular ha ki paidbah” u la ong.
Ha kajuh ka por u Bah Titos u la pynshai ruh ïa ka jingkynthoh u Bah Bindo M Lanong uba dei u nongaibuit barim ka UDP halor ka jingshah rem ka UDP ha kane ka ilekshon MP, u la ong ba kane ka jingkren ka dei ka jingkynthoh shimet ïa ki nongïalam ka UDP ym ïa ka seng UDP.
U la pynshai ba ka jingwad daw u Bah Bindo ïa ka UDP haduh mynta ka dei namar u khlem ïoh ïa ka tiket haba u leit ïakhun na Nongkrem constituency namar ka constituency jong u kaba u la jop ïa ka MLA bad MDC ka hap ha East Shillong constituency.
“Ngi dang khmih lynti ba un dang ïakhun na East Shillong constituency hynrei u la ai daw ba bun ki bym dei Khasi hynrei u la leit sha Nongkrem khlem ka jingtip ki nongkitkam hynrei ka seng ka la dep pdiang haba u MLA ka Nongkrem ha kito ki por u Bah Lambor Malngiang u la dep ïa pynbeit ban wan sha ka UDP” u la ong biang.
U la pynshai biang ba ka UDP ka khlem beh seng ïa u Bah Bindo hynrei u jngai hi namar u la ïakhun pyrshah ïa u kyrtong ba la pynïeng da ka UDP.
Nalor nangta u Bah Titos u la ïathuh ba ka UDP ka la leh bha ïa u ha ka por ba u long MLA namar la jied ban long Lamphang ka ïingdorbar thaw aiñ, la jied ban long Symbud Myntri Rangbah ka jylla bad mynta haba u la rem ïa ka ilekshon MLA la thung ïa u kum u MDC ha KHADC.
Ha kajuh ka por u la ong ba ka seng ka dang khmih lynti ba u Bah Bindo un wanphai biang sha ka UDP.
