Nongstoiñ, Jylliew 13
Ka lympung ïalehkai West Khasi Hills District Level Subroto Mukherjee Cup Football Tournament 2024 ba la pynlong da ka shlem trei kam jong ka District Sports Officer (DSO), West Khasi Hills ka la sdang ha ka Sngi Palei. Ïa kane ka lympung ïalehkai mynta u snem la pynlong ha ar tylli ki madan ïalehkai kata ha madan NDSA ha Nongpyndeng bad ha ka madan New Nongstoiñ. Ki la don 30 tylli ki skul na kylleng ki jaka jong ka District ki la wan ban ïashim bynta ha ka kyrdan ïalehkai Under-17 jong ki khynnah shynrang bad kynthei lem bad ka Under-15 ki shynrang.
Haba phai sha ki katto katne ki jingïakhun kiba la long ha kane ka sngi sdangha Nongpyndeng ha ka Under-15, ka Borsing Memorial Secondary school ka la khur ïa ka jingjop da kaba ka la lah ban pynliem noh da 3-0 kol ïa ka St. Peter’s Higher Secondary School lyngba ka tie-breaker hadien ka jingïakhaid khlem don ba thep kol.
Ha ki Under-17 ki kynthei, ka Joel Gatphoh Higher Secondary School ka la khur ïa ka jingjop hadien ba ka la lah ban pynliem noh ïa ka Borsing Secondary School da 1-0 kol.
Nangta ha madan New Nongstoiñ ka Mount Hermon Academy Secondary School ha ki Under-17 ki shynrang ka la khur ïa ka jingjop hadien ba ka la pynliem noh 3-2 kol ïa ka Borsing Memorial Secondary School lyngba ka tie-breaker hadien ka jingïakhaid ha ka jingïalehkai.
Shuh shuh ka Presbyterian Siejlieh Higher Secondary School ka la jop ïa ka Tetra ‘N’ Plus Secondary School da 1-0 kol.
Ha katei ka sngi sdang ïa katei ka lympung, nalor ki nonghikai bad kiwei kiwei la don lang ruh ka DSO Kong Balarina Syiem.
