Shillong, Jylliew 13
Ka jingjur slap ha Lauderhill ka lah ban buh ha ka jingartatien ïa ka India na ka bynta ka jingïalehkai kaba khatduh jong ka Group ‘A’ ha ka lympung jong ka ICC Men’s T20 World Cup pyrshah ïa ka Canada.
Ïa kane la pynbna da ki bor peit mariang na ka bynta katei ka jaka, ha kaba ka jingïalehkai kan long ha ka sngi Saitjaiñ.
Kumba ka paw ka India kam don kano kano ka jingkhuslai namar ka la ïoh rung lypa sha ka ‘Super Eight’. Hynrei ka Pakistan ka don hapdeng ka jingartatien ban ïoh rung. Lada ïa ka jingïakhun hapdeng ka USA bad ka Ireland kaba la thmu ban long ha ka sngi Thohdieng ha Lauderhill yn pynsangeh noh, te kumta ka USA kan ïoh rung na ka Group ‘A’ bad ka Pakistan ka lah ban duh noh ïa ka lad bam jam sha kawei pat ka wat.
Kumjuh ïa ka jingïalehkai hapdeng ka Sri Lanka bad Nepal kaba la long ha Lauderhill la pynsangeh noh ha ka sngi Ba-ar na ka daw ka jingjur slap. Te kumta kane ka la pynkut noh shi syndon ka jingïaid lynti ka Sri Lanka ha kane ka lympung.
Shuh shuh la ong ba kiba bun ki liengsuiñ kiba rung bad bamih na Fort Lauderdale-Hollywood International Airport (primary airport for Lauder-hill) la hap ban pynsangeh na ka daw ka jingjur slap.
