Shillong, Jylliew 14
Hadien ki jingkhñium ïa ka rukom treikam bad ki jinghiar ka rukom ïoh-lum pisa, ka Meghalaya Energy Corporation Limited (MeECL) mynta ka la sdang ïoh ka jingïaroh bad kane ka la wan na ka kynhun ki karikor (engineer) jong kane ka Corporation kiba la shim syndon da ka rai ban nang kyrshan ïa ki sienjam kiba la shim da ki bor bahalor naduh ka rukom treikam bad rukom ïoh lum ïa ka pisa, kumjuh ruh ki jingkyrshan kiba wan na ka Sorkar kynthup ka jingmang pisa `200 klur na ka bynta ban siew ïa ka bai ilektrik sha kane ka kompani.
Kane ka kynhun ki karikor jong ka MeECL hapoh ka synjuk Association of Power Engineers (APE) ka la rai ruh ban kyrpad ïa ki bor bahalor jong ka Corporation ban sdang noh hapoh shi bnai ïa ka jingthungkam ha ki kyrdan bapher-bapher khnang ba ka rukom treikam kan kham biang bad kan ïarap ban pynduna ïa ka jingkhia jong ka kam haba ai jingshakri namar ka jingduna ki nongtrei.
Ka APE ka la shim ïa ka rai ha ka jingïalang jong ka synjuk kaba la pynlong ha U Soso Tham Auditorium, Shillong ha ka Sngi Thohdieng.
Haba kren sha ki lad pathai khubor, u President ka APE u Bah Arju Dkhar u la ong ba ka seng ka la ïakren ïa ki katto-katne ki mat kiba dei ban pynbha ïa ka jingtreikam jong ka MeECL bad ki jingbha na ka bynta ki nongtrei.
U la ong ba ka APE ka la rai ban ai jingkyrshan ïa ki bor bahalor ka MeECL bad ïa ki rukom treikam kiba la shim hapoh ka jingïalam u CMD ban kyntiew ïa ka MeECL naduh ka jingïoh lum ïa ka pisa.
U la ong ba ka jingai jingshakri ki nongtrei ka MeECL ka long kaba khia khamtam haba jia ki jinglynshop mariang ha kaba ki mih ki jingdonkam ban pyndep kham kloi ïa ki kam maramot kiba ïadei bad ka jingsam bording ilektrik sha ki shnong ki thaw.
Kumta u la ong ba haba duna ki nongtrei ka kam ka khia bad ki nongtrei kiba don ki hap ban trei palat pud tang ban pynbiang ïa ka jingsam bording ha kaba kiba bun ki nongtrei ki dei kiba shu thung kontrak namar khlem don shuh ka jingkhot thungkam la katto-katne snem.
“Kumta ngi dawa ban sdang noh ka jingthungkam hapoh shi bnai ha ki kyrdan bapher-bapher. Ngim ong ban thung lut shisien thung, hynrei dei ban sdang thungkam ha ki kyrdan kiba la donkam kyrkieh. Ngi khmih lynti ba ki bor bahalor kin leh noh ïa kane,” la ong u Bah Arju.
Ki don ym duna ïa ka 1000 tylli ki kam ha ki kyrdan bapher-bapher kiba donkam ban thung namar haduh mynta ki don kumba 1600 bad 1700 ngut ki nongtrei kiba shu thung kontrak.
U la ong ba kawei pat ka mat kaba donkam eh ban leh ka dei ka jingsiew tulop katkum ki kyndon treikam u snem 1996 ha kaba ki Junior Engineer kiba dei ha ka kyrdan Class II hynrei ka tulop kaba ki ïoh ka dei ha ka kyrdan Class III bad kin sa ïoh ïa ka tulop ha ka kyrdan class II tang hadien san snem ba ki la trei.
Namar kata, u Bah Arju u kyrmen ba naduh ka 1 tarik Kyllalyngkot, 2025, kane kan treikam ha kaba ki Junior Engineer kin ïoh ïa kaba dei hok ka jingsiew katkum ka kyrdan kaba dei hok.
Haba kylli kumno ki nongtrei ka MeECL ki kiew tulop man la ki san snem, wat hapdeng ka jinghiran pisa ka MeECL, une u nongïalam ka APE u la ong ba ïa kane la leh naduh mynshwa ha ka por jong ka MeSEB bad ym shym la pdiang ban ïaid katkum ka jingsiew ka Sorkar India. Tangba u la ong ba wat lada ka jingpynkiew tulop ka long man la ki san snem, hynrei ka jingpynkiew ka long kaba rit bad ka dei ban kham bun.
Haba kylli halor ka ‘terminal benefit’ ne jingmyntoi kaba la mynjur hadien ba pynkylla corporation, u Bah Arju u la ong ba ka pisa kaba kot sha ka `840 klur naduh ka 1 tarik Ïaïong, 2010 mynta ka la kiew sha ka `3,400 klur.
Hynrei u Bah Arju u la ai khublei ïa ka Sorkar bad ïa u Myntri Rangbah bad ka Kynhun Myntri kaba la sngewthuh ïa ka Electricity Act, 2003 namar ka Corporation mynta ka la sdang ïoh jingkyrshan haba ïadei bad ka terminal benefit.
Ka APE ka sngewnguh ïa ka Sorkar Jylla kaba la pynrung ha ka mang tyngka kumba `200 klur ban siew ïa ka bai ilektrik sha ka MeECL kaba ki tnat treikam ka Sorkar ki dei ban siew.
Shuh shuh ka APE ka kubur ruh ba ka rukom treikam ka kham biang da kaba ai jingïaroh ïa u CMD uba mynta naduh ki sienjam kiba la shim ban ïoh lum ïa ka pisa da kaba ïai bthah ïa ki nongtrei ban leit wad bad lum ïa ka pisa kaba sahteng na ka bynta ka jingmyntoi ka MeECL bad ki nongtrei.
