Shillong, Jylliew 14
Ka khlur ïakura ka ri kaba la khur ïa ka takma rnong ha ka Tokyo Olympics, ka Lovlina Borgohain (75kg) ka la shah rem noh ha ka Cindy Ngamba jong ka Refugee Boxing Team ha ka Grand Prix Usti Nad Labem kaba la long ha ka Sngi Palei ha Czech Republic.
Kane ka ‘thei ïakura kaba dang pynkhreh ban ïashim bynta ha ka Paris Olympic, ka la shah rem noh da 0-5 lyngba ka jingrai lang da baroh ki nongbishar ha ka jingïakhun kaba ar jong ka 75kg bout ha kaba ka Ngamba ka la ïoh rung sha katei ka lympung ka ban long ha Paris.
Wat la katei ka ‘thei ïakura kaba dang 26 snem ka rta kaba la long tang marwei napoh ka ri ka la mad ïa ka jingshah rem, hynrei ka jingïaid lynti jong ka ha kane ka lympung kam pat shym la kut bad kan pynkhreh ïa ka jingïakhun ka ban wan pyrshah ïa ka Li Qian kaba ha China.
Ka Qian, kaba la khur takma ar sien ha ka Olympic bad kaba khur takma lai sien ha ka World Championships kynthup ïa ka takma ksiar, ka la lah ban pynliem tang ïa ka Borgohain ha ka Asian Games kaba la long ha u snem ba la lah.
Ïa kane ka lympung la pynlong hapoh ka jingkhmih da ka World Boxing, ha kaba ki la don saw ngut ki ‘thei ïakura kiba la ïashim bynta ha ka kyrdan ïalehkai 75kg kata ka Borgohain, Ngamba, Qian bad ka Chantal Reid.
Kham ha shwa ka Borgohain ka la lah ban ïakhun tyngeh na ka bynta ban pynliem ïa ka Reid kaba na Englang ha ka sngi Palei.
Ka Borgohain ka la long kawei napdeng ki hynriew ngut ki nongïa-kura ka ri ban ïoh rung sha ka Paris Olympics. Kaneka ‘thei ïakura kaba dang 26 snem ka rta ka ka la khmih lynti ban khur ïa ka takma kaba ar ha ka Olympic.
