New Delhi, Jylliew:
Ka World Health Organization (WHO) ha ka Sngi Ba-ar, ka la pyntikna halor ka jingpang khlam ki sim ‘Bird Flu’ ba la lap na u briew hapoh India. Kane ka jingpang ka dei kaba la pur lyngba jong u khñiang jingpang H9N2 Virus bad ïa kane la lap na uwei u khynnah 4 snem uba dei na ka jylla West Bengal jong ka ri India.
Ia utei u khyllung la pynthiah bad sumar hapoh ka Intensive Care Unit (ICU) jong kawei na ki hospital paidbah ha katei ka jylla hadien ba la iohi ïa ki jingshitom haba iadei bad ka rukom ring mynsiem. Kane ka dei ka sien ba ar ban lap ïa katei ka jingpang khlam ki sim ba kan pur sha ki briew ha ka ri India. Ka sien ba nyngkong ka dei ha u snem 2019 ha kaba la shem hi ïa kane kajuh hynrei kam da don pat ka jingma ïa ki nong India kiba bun namar katei ka jingpang kam da pur than eh ha utei u snem.
