Shillong, Jylliew 14
Ki ar tylli ki kynhun ïalehkai jong ka Assam Rifles Public School ki la ïoh ban rah biang sa shisien ïa ka nam lahduh ha ka lympung ïalehkai District Level Interschool Subroto Cup Football Tournament 2024 ba la pynïaid da ka shlem treikam District Sports Officer (DSO) East Khasi Hills ryngkat bad ka Tyrsad Secondary School ha ka liang ki kynthei.
Ha ka jingïakhun final jong ka Under-17 (Boys) kaba la long ha ka Sngi Thohdieng ha madam Third Ground Polo, ka Assam Rifles Public School ka la pynliem noh ïa ka Umphyrnai Presbyterian Secondary School lyngba ka tie-breaker da 4-2 kol hadien ba kim shym lah ban thep kol.
Kumjuh ha ka jingïa-khun final jong ka Under-15 (Boys), ka Assam Rifles Public School ka la pynliem noh ïa ka Umphyrnai Presbyterian Secondary School lyngba ka shi kol ba la thep da u Thanggoulum Vaiphei ha ka minit kaba 6.
Haba phai sha ka Under-17 (Girls) ka Tyrsad Secondary School ka la pynliem noh ïa ka Umpoh -liew Jingtip Secondary School lyngba ka shi kol ba ka thep da ka Lapdianghun Rani ha ka minit kaba 9.
Ïa ka nam Best Players U-17 ki kynthei la khur da ka Ibashembha Khongsit na ka skul Tyrsad, katba ha ka U-15 la khur da u Medonbanshan Kurkalang bad ha ka U-17 ki shynrang la khur da u Banlamkupar Rynjah, kiba la na ka Assam Rifles Public School.
Te kumta ka Assam Rifles Public School bad ka Tyrsad Secondary School kin mihkhmat ïa kane ka district sha ka State Level Inter School Subroto Cup Football Tournament 2024 ban pynlong shen da ka tnat ïalehkai jong ka Sorkar Jylla ha kane ka nongbah.
Ïa ki khusnam sha kine ki kynhun la wan ban sam da u General Secretary ka Meghalaya Football Association u Bah Sunesh Syiem, kumjuh u Working President u Bah Cliff Nongrum, u Secretary ka Shillong Sports Assciation Bah Dipshon Nongbri, ha kaba la ïadon lang u DSO Bah O.Mawthoh bad kiwei .
