Imphal, Jylliew:
Da ka jingïoh ban pynphai ïa 38 ngut ki poiwir na Manipur sha Myanmar ha ka Sngi Ba-ar, ki la don baroh kumba 115 ngut ki poiwir kiba dei ki nong Myanmar, kiba kynthup ïa ki longkmie bad ki khynnah, ki la shah pynphai biang sha ka ri jong ki naduh ka 8 tarik, Lber, la ïathuh ki heh pulit.
U Myntri Rangbah jong ka Manipur u N. Biren Singh ha ka jingphah khubor lyngba ka rynsan X, u la ong, “Ha kaba ïadei bad ka jingleit pynphai ïa ki poiwir, ka sorkar Manipur ka la pynphai ïa 38 ngut ki nong Myanmar sha ka ri jong ki lyngba ka Integrated Check Post (ICP), Moreh.”
“Ïa kine la aiti sha ki heh ba dei khmih jong ka Myanmar da ki heh ba dei khmih ïa ki poiwir jong ka sorkar India kiba la shah pyntreikam ha ICP, Moreh. Ka sorkar jylla ka dang ïai bteng ha ka ban wad ban lap ïa ki poiwir kiba la shu wan rung beaiñ sha ki bynta jong ka ri bad ïa kiba ym pat lah ban pynphai biang ïa ki sha ka jaka ba ki wan. Ai ba ngin lah ban ïada ïa ki bynta khappud bad ka ri jong ngi,” u la bynrap. Ka sorkar Manipur ka la ong ba ha ki ar bynta jong ka jingpyntreikam kaba la long ha ka 8 tarik, Lber bad ka 2 tarik, Jymmang, ki la don kumba 77 ngut ki poiwir jong ka Myanmar kiba la shah pynphai lyngba ka khappud Moreh kaba don ha Tengnoupal distrik jong ka Manipur.
Ka sorkar jylla ka la ïai bteng ha kaba ïadei bad ka jingithuh ïa ki poiwir kiba la rung beaiñ na Myanmar bad ha kajuh ka por ban wad bniah bad buh jingthoh halor ka jingdon jong ki, u la ïathuh ha ka jingïakren bad ki nongthoh khubor.
Ki nongshong shnong jong ka Myanmar ki la phet sha Manipur hadien ka jingshah leh donbor ha ki riewkieng atiar kiba la knieh jubor ïa ka bor synshar ha ka ri ba marjan ha ka 1 tarik, Rymphang, 2021.
U Myntri Rangbah jong ka Manipur u la ong hashwa kane ba wat lada ka India kam pat soi ïa ka 1951 Refugee Convention, ka la ai jaka sah bad jingïarap sha kito kiba la phet shnong ha Myanmar namar ka jingshah ban beiñ. Naduh ba ka kynhun shipai ka la shimti ïa ka jingsynshar ïa ka Myanmar palat ïa ki lai snem, ki la don kumba 8,000 ngut ki nong Myanmar kiba la ïoh jaka sah ha Tengnoupal, Chandel, Churachandpur, bad Kamjong distrik, ha Manipur, katba palat 36,000 ngut ki la ïoh jaka sah ha Mizoram.
Hadien ka jingkyntu bad ka jingai jingmut jong ka Ministry of Home Affairs (MHA), ka sorkar Manipur ka la lum ïa ki jingtip kiba bniah ha kaba ïadei bad kine ki nong Myanmar kiba la sah ha ka jylla.
Ka sorkar Mizoram, ha kaba ïadei bad kane, ka la kyntait ïa ka jingai jingmut jong ka MHA ban lum jingtip shaphang ki poiwir na Myanmar.
