Thiruvananthapuram:
Naba ki jingtieng jingsyier kim don shuh hadien ba la mih ka jingïakynad kaba jur ha ka jylla Manipur, ki la don kumba 47 ngut ki khynnah skul na Manipur kiba la leit ban pule lang bad ki khynnah skul bathymmai ha St Thomas Higher Secondary School kaba don ha Pathanamthitta hadien ba la plie biang mynshem taïew.
Ki khynnah skul bad ki nonghikai jong kane ka skul kaba don ha Eruvellipra ki la ïasnohktilang ban pdiang burom ïa kine ki khynnah thymmai.
Kine ki khynnah thymmai ki la pyni da ka khmat phuh samrkhie, wat lada ki la ïakynduh jingeh bad shah ktah na ka jingjia ïakynad, ka durkhmat jong ki ka la pynpaw ba kim don jingshah ktah ei ei shuh na ki jingkynmaw ïa ki jingjia kiba la jia hashwa.
Na kine ki 47 ngut ki khynnah skul, kiba bun ki dei ki riewlum Kuki bad ki shong ki sah ha Chandel kaba long ka thaiñ kaba la shah ktah jur na ka jingjia jong ka jingïakynad, ki la don kumba 39 ngut kiba la pynrung kyrteng ha ki Higher Secondary Section, katba phra ngut ki la leit ban pynrung kyrteng ha ki Upper Primary Section jong ka skul.
Ka Malankara Catholic Church, kaba la pynïaid ïa kane ka skul kan sa pynbiang ïa baroh ki jingdonkam ha kaba ïadei bad ki jinglut baroh ha ki jingple bad ki jingdonkam jong kine ki khynnah skul kynthei bad ban kyrshan ïa ki haduh ba kin da lah ban pyndep ïa ki jingpule jong ki.
Ïa ka projek ha kaba ïadei bad ka jingai jingbit ïa kine ki khynnah kiba na Manipur ba kin bteng biang ïa ki jingpule jong ki ha Kerala, la pyntreikam da u Thomas Mar Koorilos, uba long u Metropolitan Archbishop jong ka Tiruvalla, la ïathuh ki heh nongpynïaid jong kane ka ïingmane.
U Shaji Mathew, u Headmaster, u la ong ba ïa kine ki khynnah skul la ïalam na Manipur sha Pathanamthitta da ka Sathyam Ministries, kaba long ka Christian Organisation, ha ryngkat ka jingpynbiang ïa ki kot donkam baroh.
“Kine ki khynnah ki nang bha ban kren ïa ka ktien phareng. Namar kata, kin ym ïakynduh jingeh ei ei ha ka ban ïakren bad kiwei pat ki para khynnah skul ha kane ka skul thymmai jong ki. Hashwa ba kin leit sdang ïa ka jingpule, kine ki khynnah ki la hap ban leh ïa ka eksam kum ha ki subjek English bad Mathematics, ba la pynlong da ki nongpynïaid skul kiba dei ban khmih bniah halor ki kyrdan pule jong ki,” la ong u Shaji.
U C V Vadavana, uba long u Director jong ka Sathyam Ministries, u la ai jingïarap na ka bynta kine ki khynnah ban leit sha Kerala. Kine ki la sah ha ki ïing ba la buh kyrpang na ka bynta ki khynnah. Ha ka sngi basdang skul, kine ki khynnah ki la pyni sngewbha da ka jingshad tynrai jong ki.
