Shillong, Jylliew 16
U Wout Weghorst uba la mih bujli ha ka kylla miet, u la pynïoh ka jingjop ïa ka Netherlands lyngba ka kol kaba u la ïoh thep ha ki minit shwa ban wai ka jingïalehkai pyrshah ïa ka Poland kaba la long ha ka Sngi U Blei ha ka lympung Euro 2024.
Haba phai sha kane ka jingïalehkai, ka Nether-lands ka la lah ban pynliem noh ïa ka Poland da 2-1 kol. U Weghorst uba dei ruh u rangïalehkai shakhmat ka Burnley, uba la lah ban paw ha ka lympung 2022 World Cup, ha kane ka kynti ruh u la lah biang ban pynpaw ïa ka jingtbit ïalehkai ka jong u, ha ka jingïalehkai pyrshah ïa ka Poland kaba la long ha Hamburg.
Ha kane ka jingïalehkai, ka Poland kaba la ïakhun tyngeh khlem da don lang ryngkat u khlur ïalehkai jong ka, u Robert Lewandowski uba dang don hapdeng ka jingshitom, la i kumba kan ïoh rah shi point hynrei ka kol ba la thep da u Weghorst ka la pynpulom noh.
Haba phai sha ka jing-ïalehkai, dei ka Poland kaba la ïoh ban khyrwit ka kol ba nyngkong lyngba u Adam Buksa, uba la mih bujli ha ka jaka u Lewan-dowski tang ha ka minit ba 16 hynrei ha ka minit kaba 29, u Cody Gakpo u la ïoh ban pynphai ïa kane ka shi kol na ka bynta ka Netherlands.
Ha kane ka jingïalehkai, ka Netherlands ka la pynlehnohei katto katne ki kabu ksiar, kaba la pynlong pat ïa ka Poland ban nanglah ban ïalehkai bha bad la i kumba kane kan jingïalehkai kan kut ha ka jingïakhaid, hynrei ka kol ba la khyrwit da u Weghorst ha ka minit ba 83 ka la biang pura ïa ka Netherlands ban khur ka jingjop ha kaba sdang ïa kane ka lympung.
U Ronald Koeman uba dei u Coach, uba la shimti ha ka sien kaba ar, u dei uba la don bynta ban khur jingjop ïa ka nam lahduh bad ka Netherlands ha u snem 1988, kum u rangïalehkai.
Ka Netherlands, kaba la ïakhun tyngeh ar snem mynshwa ha ka lympung Qatar World Cup, hadien ba ka khlem lah ban ïoh rung sha ka lympung Euro 2016 bad ha ka lympung 2018 World Cup, ka la mih madan ha kane ka lympung ba mynta da ka mynsiem ïakhun ban ieh shadien ïa kiei kiei baroh.
Watla ka Netherlands kam don shuh ïa ki khlur ïalehkai shakhmat kum jong u Arjen Robben, Ruud van Nistelrooy bad Robin van Persie hynrei ki lai ngut ki rangïalehkai shakhmat ba mynta ba kynthup ïa u Gakpo, Memphis Depay bad Xavi Simons ruh ki la lah ban buh jingeh ïa u kol ka Poland u Wojciech Szczesny.
