United Nations, Jylliew:
Ka tnat UNICEF ha kane ka kynti ka la maham halor ka jing- shongsyier ia ki khynnah wat haduh kane ka juk ba mynta ba ki ri kiba bun ki la lah ban pynbit-pynbiang hynrei ka long kaba sngew lyngngoh ba ha kane ka juk ki dang don shibun ki khynnah kiba dang sahdien bad kiba dang hap ban shah thngan bad ban mad ia ka jingkyrduh bam. Namar katkum ka kaiphod ba la ioh lum da katei ka tnat, la shem ba kumba shi na ka saw bynta (1/4) na ki khynnah kiba hapoh 5 snem ha kylleng ka pyrthei ki dei kiba don hapdeng ka jingkyrduh bam.
Kumta, la ong ba kane ka pyni ba kumba 180 Million ngut ki khyllung-khynnah kiba dang hapoh katei ka rta ba 5 snem, ki don hapdeng ka jingeh kaba khraw namar ka jing bym ioh jongki ia ka bam kaba ki dei ban ioh bad ban tei ia ka met jongki bad ym tang katta hynrei kim ioh wat tang ka bam ba ki dei ban pynkdang bad pynïoh bor ia ka met ruh namar ka jingduk- jingkyrduh kaba ki hap ban mad.
Kumta, ka UNICEF ka la ong ba ka la ong kaba sngew kyndit ban shem ba tad haduh kane ka juk mynta ruh ki dang don ki paidbah kiba hap ban mad ia ka jingkyrduh bam bad ka jingïap thngan.
Namar katei ka tnat ka la batai ruh ba ki khynnah kiba dang ha kitei ki rta ba sdang ban heh ban san, ki donkam bha ia kumba 8 jait ki jingbam kiba ki dei ban ioh man la ka sngi khnang ba kan tei ia ka met bad kan iarap ban pynbiang ia ka koit- ka khiah jongki. Kitei ki jait jingbam ki kynthup ruh naduh ka buiñ jong ka kmie kaba dei ban bsa bad pynkdang ia ki, ki kynja shana, ka doh, dohkha, pylleng bad kiwei kiwei de ki jhur lane ki soh ruh kiba don ia ka ‘Vitamin-A’ bad kumjuh ruh kiwei de ki jait soh bad jait jhur kiba don ia kiwei kiwei ruh ki jait ‘Vitamin’.
Hynrei la shem pat ruh ba kumba 440 Million ngut ki khyllung- khynnah kiba hapoh ka 5 snem ka rta, ki don ha ki 100 tylli ki ri kiba ym pat da bit- da biang bha bad ki hap ban mad ruh ia ka jingkyrduh bam bad wat ia ka jingïap thngan. Kane ka pyni ba kitei ki khyllung- khynnah kim shym don lad ban ioh mad ne ioh bam ia kum kitei ki jait jingbam kumba 5 jait eh khnang ban tei ia ka met bad ban pynbiang ia ka jingkoit- jingkhiah jongki.
Napdeng kitei pat, kumba 180 Million ngut ki dei kiba don hapdeng ka jingkyrduh kaba jur bad kiba ym shym lah ban ioh wat tang ka bam ba kin pynkdang bad ban ai bor ia ki ba kin iaid- kin ïeng bad kin im kumba long kiwei pat ki khyllung khynnah ha kiwei pat ki ri.
