Shillong, Jylliew 16
U Fabian Hurzeler u la kylla long u manager ba dang khynnah tam ha ka lympung English Premier League hadien ba ka club Brighton ka la pynbna ïa ka kyrteng jong u ha ka sngi Saitjaiñ, ba ka la thung ïa u kum u Head Coach ba thymmai ka club.
U Hurzeler ba dang 31 snem ka rta, uba la lah ban lam lynti ïa ka St Pauli ban rah ka nam lahduh ha ka Second Division jong ka lympung Bundesliga ha Germany, u la soi ïa ka kontrak bad ka Brighton haduh u snem 2027.
U Hurzeler uba la kha ha Texas mynta un long u hehduh ban pynïaid ïa ki rangïalehkai ka club ha kaba ki don katto katne ki rangïalehkai ba kynthup ïa u James Milner, 38 snem, u Danny Welbeck, 33 snem bad u Lewis Dunk, 32 snem kiba la kham heh ka rta ban ïa u.
Katba na ka liang u Chairman ka Brighton u Tony Bloom u la ong ba ki kam jong u Hurzeler ban ïalam lynti ïa ka St Pauli sha ka lympung ba hehduh ha German ka la pynlong ïa u kum uwei na ki kyrtong ba biang tam ban shimti ïa ka jaka jong u Roberto De Zerbi, uba la mih noh na ka club ha kaba kut jong kane ka aiom ba la dep.
U Hurzeler un sa shimti ïa ka kam ynda u la ïoh ïa ka ‘work permit’ shwa ba ka thup ki rangïalehkai ka Brighton kin pynkhreh ban leit ïalehkai ha ka pre-season ka ban long ha u Naitung.
“Naduh kaba sdang jong ka kam ban thung ïa u head coach ba thymmai jong ngi, u Fabian u la long lypa u kyrtong uba biang tam bad uwei napdeng kiwei uba la lah ban pynphai khmat ïa ngi khamtam hadien ka kam kaba u la trei 18 bnai bad ka St Pauli,” la ong u Bloom.
“U don ka rukom ïalehkai kaba ïadei dur bad biang bha bad kaei kaba ngi kwah hapoh ka Brighton and Hove Albion ban ïalehkai bad nga don ka jingshaniah ba wat na ka liang ki nongkyrshan jong ngi kin ïaroh bad leh kmen lang,” u la ong.
U Hurzeler, uba la shimti nyngkong ïa ka kam coach ha u snem 2016, u la ong, “Nga dap da ka jingkmen ban shah thung kum u head coach ba thymmai ka Brighton and Hove Albion.”
