Shillong, Jylliew 16
Ka kynhun National Democratic Alliance (NDA) kaba ïalam da ka BJP kam pat lah ban pynbna ïano napdeng ki MP kiba donlang hapoh ka kynhun kan phah ïakhun ha ka ilekshon ban jied ïa u Lamphang (Speaker) ka Ïingdorbar Lok Sabha, wat la ka dorbar kaba nyngkong jong ka Ïingdorbar Lok Sabha kaba khatphra kan sdang ha ka 24 tarik mynta u Jylliew.
Katkum ka khubor, ka paw ba ki ar tylli ki seng saiñ pyrthei; ka Janata Dal (United) kaba don 12 ngut ki MP bad ka Telegu Desam kaba don 16 ngut ki MP ka don ïa ka jingkwah ban ïoh bat ïa ka kyrdan Lamphang (Speaker) ka Ïingdorbar Lok Sabha khamtam hadien ba ka BJP ka la bat hi ïa kiba bun ki tnat treikam kiba kham kongsan kum ka tnat pla tyngka bad tnat korbar ri.
Ka dorbar jong ka Ïingdorbar Thawaiñ Lok Sabha kaba khatphra kan long naduh ka 24 tarik Jylliew haduh 3 tarik Naitung.
Ka jingpynsmai ïa ki MP ka Ïingdorbar Lok Sabha kiba dang shu shahjied ha ka ilekshon kaba dang shu dep kan sdang naduh ka 24 tarik kum ka jingpynskhem ïa ka jinglong dkhot jong ki hapoh ka Ïingdorbar Lok Sabha kaba khatphra jong ka ri.
Ïa ka dorbar yn sa pynïaid shipor da u Protem Speaker kat bym pat jied ïa u Speaker ka Ïingdorbar Lok Sabha.
Ha ka ilekshon ban jied Speaker, ka kynhun INDIA kaba don palat 230 ngut ki MP ka lah ban buh kyrtong ban ïakhun khamtam lada kam don ka jingïabeit hapoh ka kynhun NDA. Ka kynhun INDIA ka lah ruh ban ïakhun ha ka ilekshon Deputy Speaker.
