Kohima, Jylliew:
Ka Nagaland ka la pynkhlaiñ na ka bynta ban pynlong ïa ka ilekshon Urban Local Bodies (ULB) kaba nyngkong ha ka 26 tarik, Jylliew. Kane kan sa pyni ruh ïa ka dak jong ka jingïaid lynti ha kaba ïadei bad ka synshar paidbah ha ka jylla.
Kane ka ilekshon ka ban pynsah kynmaw kan sa sakhi ïa ka jingïashim bynta jong lai tylli ki Municipal Councils bad 36 tylli ki Town Council, ha kaba la ong ba ka la don kumba 33 per cent ka jingmang na ka bynta ki kynthei ha kane ka jingïakhun.
Ka rai ban pynlong ïa ka Municipal Elections ha kaba la mang jaka ruh na ka bynta ki kynthei kum ki nongïakhun ka la long hadien ba la dep ban pynlong ïa ka ilekshon ULB ha u snem 2004, ha kaba la donkam kum ïa kane ka ilekshon.
Ka jylla ka la don ïa kumba 418 tylli ki Wards ha kylleng ki 39 tylli ki Municipalities bad Town Councils, ha kaba 142 tylli ki Ward la mang na ka bynta ki kynthei. Napdeng ki Council kiba kham paw khmat, ka Kohima, Dimapur, bad Mokokchung ki la hap hapoh ka Municipal Councils, katba kiwei pat kiba dang sah ki la shah kynthup ha ki Town Council.
Kumba la thmu ban pynlong ïa kaneka ilekshon, ïa ki jingpynrung kyrteng la pdiang naduh ka 7 tarik, Jylliew haduh ka 11 tarik, Jylliew, ha kaba yn sa bud da ka jingkhmih bniah ïa ki kot pynrung kyrteng ha ka 13 tarik, Jylliew. Ki kyrtong kin sa ïohlad haduh ka 20 tarik, Jylliew na ka bynta ban weng ïa ki jinglong kyrtong jong ki.
Ha kajuh ka sngi, ïa ka thup kyrteng jong ki kyrtong bad ki jaka ban pynlong ïa ka jingthep vote yn sa buh bad pynbna kham hadien.
Lada dei ba donkam na ka bynta ban pynlong biang ïa ka jingthep vote, yn sa pynlong ha ka 28 tarik, Jylliew. Ka tarik na ka bynta ka jingñiew ïa ki vote kan sa long ha ka 29 tarik, Jylliew.
Naba la pynbna ïa ka tarik ban pynlong ïa ka jingthep vote, ïa ka Model Code of Conduct la pyntreikam ha baroh ki thaiñ ba hap hapoh ki Municipal bad Town Council kiba dei ban pynlong ïa ka jingthep vote, kiba la treikam bad ki ban sa kut haduh ban da kut ka jingthep vote.
