Ha ka ilekshon ha ki Ri ba don ka jingsynshar paidbah, ka jingkheiñ sting bad ka jingkheiñ biej ïa ki paidbah nongthep ‘vote’ ka long kaba bakla shibun. Ngi kynmaw ha u snem 2004 ha ka por ba ka BJP ka dang don ha ka bor, ka la pynmih ïa kata ka ‘India Shining Campaign’. Baroh ki la ïa khmih lynti ba ka sorkar u Atal Bihari Vajpayee ha kato ka por kan wanphai sha ka bor synshar. Phewse, ki paidbah ki khlem pynjop shuh ïa ka BJP, bad ki la ailad ïa ka Congress bad ki seng kiba kyrshan ïa ka ban synshar na ka bynta 10 snem hashwa ba kin ailad biang ïa ka BJP. Na ka liang ka Congress ruh ka la kheiñ sting bad ka la ngat ha kiba bun ki jingshah kynnoh bamsap bamngem haduh ba ki paidbah ki la ngiah hi shoiñ. Ka jingmih pyrthei jong u Anna Hazare ha kito ki por ka la nang pynduh bor ïa ka Congress bad ïa ki seng kiba synrop bad ka, bad ka la ai mynsiem ïa ka BJP.
Ka jingwan jong u Narendra Modi ha u snem 2014 ka la pynshaïong ngaiñ ïa ka Congress ha kaba ka la shah rem kput, bad kane ka la bteng ruh ha ka ilekshon ha u snem 2019. Hynrei ha kane ka kynti, hapdeng ka jingkhmih lynti ba ka BJP kan ïoh ym duna ïa ka 300 ngut ki MP, ki paidbah ki la ai ïa ka rai ban pynneh ïa u ha ka shuki Myntri Rangbahduh tangba hapdeng ka jingdon ka liang pyrshah kaba khlaiñ, bad ym shuh kumba long ha u snem 2014 bad 2019 namar imat ki la sngewthuh ïa ka jingma lada aibor than tang ha uwei u nongïalam namar un ym don jingtieng shuh ïa ki paidbah kiba pynjop ïa u.
Ha kine ki 10 snem ba la leit noh, ngi kynmaw ba ka BJP ka la synshar katba ka mon khlam da sngap shuh ïa kaei kaba ka liang pyrshah ka don ban ong. Ha ka jingshisha, ha ka synshar paidbah, ka sur jong ka liang pyrshah ruh ka long ka bakongsan. Tang ba jop bun ngut ki MP ne MLA, kam mut ba dei ban bret noh ïa ka liang pyrshah sharud. Hynrei kaba sngewsih ka long ba ha kine ki 10 snem, kane ka la jia haduh ba ki MP ka liang pyrshah ki la hap ban pynkulmar ïa ka Dorbar ha Parliament kaba la ïalam sha ka jingduhnong jong ki paidbah. Tangba ka liang pyrshah ka khlem don lynti da kawei pat namar ka sorkar ka khlem sngap ïa ki jingdawa bad ki jingpynsngew jong ka. Hooid, ka liang pyrshah ka la shah kynthoh namar ka jingpynkulmar ïa ka Dorbar. Bad ha kata ka jingpynkulmar, ka sorkar ka la ïohlad ban wanrah bad ai jingmynjur ïa kiba bun jait ki aiñ rew khlem da don ka jingïatai ne jingïakren.
Mynta, ngi donbok ba ka liang pyrshah ka la ïoh bor biang, hynrei kito ki bym kyrshan ïa ka liang kaba synshar, kin ngat ha ki jingeh. Balei ha ka Ri kaba ïar yn donkam ban sngap tang ïa kiba kyrshan sorkar bad ban kheiñ dewthala ïa ki bym kyrshan? Ha ka jingshisha, ka sorkar kaba stad ka dei ban sngap bha ïa ki sur jong kiba pyrshah khnang ba kan lah ban pynbeit ïa ki jingbakla. Phewse, tang namar ka jingbym sngewïahap watla ki jingai jingmut ne jingkynthoh ki dei kiba shong nongrim, la shu kyntait beit ïa ki sur jong kiba pyrshah. Kawei ka jinglong kaba ngi hap ban pynduh ka long ban ym pdiang ïa ki jingkynthoh na kiwei watla ki long kiba shong hok. Kane ka treikam la ka dei ha ka jingim shimet ne ha ki kam paidbah ruh. Tang ba kynthoh kam mut ba ka don ka jingisih ne jingpihuiñ. Kiba bun ki jingkynthoh, ha ka jingshisha, ki long na ka bynta ka jingbhalang jong ka baroh.
Ym sngewlah shuh ban ap ïa kata ka Dorbar Parliament ba kan sdang noh namar ngin sa sakhi ïa ka jingïapyni bor hapdeng ka liang jong ka National Democratic Alliance (NDA) bad ka INDIA Bloc. Ngi kyrmen ba kan long shisha kaba shongkun bad ka ban wanrah ïa ki soh kiba bun na ka bynta ka bha ka miat jong ki nongshong shnong. Hooid, ym dei ban pyrshah tang namar ba kwah ban pyrshah, hynrei ka dei ban long halor ki nongrim bad ka jingmyntoi jong ki paidbah. Ngi kyrmen ba ki MP na Meghalaya ruh kin ïoh ïa ka lad ban ïashim bynta ha ki jingïatai kiba bun ki ban mih ha kine ki san snem.
