Shillong, Jylliew 17
Ka shi kol ba la thep da u Jude Bellingham ka la biang pura ïa ka England ban ïoh ïa ka jingjop kaba nyngkong eh ha ka Euro 2024 hadien ba ka la lah ban pynliem noh ïa ka Serbia da 1-0 kol.
Kane ka shi kol ka la wan urlong hadien ka jingïarap pynbuh bol u Bukayo Saka bad ban pynlong ïa utei u rangïalehkai ban ïoh thep kol ha ka minit kaba 13 na ka bynta ban pynlong ïa ka England ban bat ïa ka kyrdan ba hakhlieh da kaba kamai 3 point na ka Group-C hadien ba ka Denmark bad ka Slovenia ki la ïakhaid mar 1-1 kol ha ka Sngi U Blei.
Ha kane ka jingïakhun baroh ar kynhun ki la pyrshang ban ïakhun tyngeh naduh kaba sdang bad ka England ka la long kaba donbok ba ka la ïoh ban thep kol na ka bynta ban tam shi kol haduh kaba kut jong ka kylla step.
Ha ka kylla miet ka Serbia ka la sdang ban ïoh bor ha ka rukom ïalehkai hadien ba u coach u Dragan Stojkovic u la sdang ban pynkhlaiñ ha ka bynta kaba shadien da kaba pynmih ïa u Ivan Ilic ha ka jaka u Nemanja Gudelj. U rangïalehkai shakhmat u Dusan Vlahovic u la ïoh ïa ka kabu kaba biang hapoh ‘box’, hynrei um shym la lah ban thep. Ka jinglah ban ïashan tyngeh da ki rangïalehkai ka England ka la pynlong ïa katei ka kynhun ban ym lah ban pynphai haduh kaba kut jong ka jingïalehkai.
Lyngba kane jingjop ka England kan pynkhreh ïa ka jingïakhun ka ban wan pyrshah ïa ka Denmark ha ka Sngi Palei bad ka Serbia ïa ka Slovenia.
