Khliehriat, Jylliew 17
Ka long ka jingsarong ïa ka District bad ka Jylla hi baroh kawei namar ka Batbitbha Bareh kaba dei na Dkhiah, East Jaiñtia Hills ka la long ka kynthei ba nyngkong na ka district ban long ka National Referee ha ka jingïalehkai phutbol.
Kane ka la urlong hadien ba ka Batbitbha Bareh ka la pass ïa ka National Examination (Level 5).
Ha ka shithi sha u General Secretary ka Meghalaya Football Association (MFA), u Director of State Referee ka All India Football Federation (AIFF), u la pynbna ba ka Batbitbha Bareh ka la lah ban pyndep ïa baroh saw tylli ki bynta jong ka National Examination (Level 5) jong u snem 2024, kaba kynthup ïa ka Fitness, Theory, Practical bad Viva Exam.
Ka Batbitbha ka la pyndep ïa ka Diploma course ha ka sports coaching ha ka jingïalehkai phutbol na ka SAI Netaji Subhas Eastern Centre, Kolkata ha u snem 2019.
Ha kawei pat ka liang u Bulmi Phawa na West Jaiñtia Hills District Sports Association (WJDSA) ruh u la pyndep ïa ka eksam na ka bynta ka NE 2023.
Na ka liang ka East Jaiñtia Hills District Football Association bad West Jaiñtia District Sports Association ki la ai khublei kyrpang ïa baroh ar ngut ki rephri bad kyrmen skhem ba kin ïoh ka jingjop ha ki jingtrei jingktah jong ki ha ki por bad snem ban wan.
