Washington, Jylliew:
U Director barim ka tnat Centers for Disease Control & Prevention (CDC)- u Robert Redfield ha kane ka sien u la maham ia ka pyrthei baroh kawei halor ka jingma jong ka khlam ‘Bird Flu’. U la ong ruh ba kane ka jingpang khlam ki sim bad ki syiar, ka lah ban dei ka khlam kaba shyrkhei ka ban wan lynshop jur ia ka pyrthei ha kine ki sngi ban wan kumba la sakhi ia ka khlam Covid-19 ha ki snem ba la leit.
Kumta, u Redfield u la ong ba wat la ki heh nongialam jong ka pyrthei kim da patiaw ia katei ka jingpang khlam ‘Bird Flu’ hynrei shisien ka sngi kane ka jingpang kan sa wan ban lynshop ia u khun bynriew kumba long ka khlam Covid ha ki snem 2020 shaneng. Kumba la iohi hi mynta katei ka jingpang ka bym ju kham pur koit sha ki briew, hynrei ha kane ka por ba mynta katei ka khlam la shem ba ka lah ban pur wat sha ki briew kiba don marjan bad kito ki jait sim ne ki jait mrad kiba la ioh kem ia katei ka jingpang khlam.
Utei u heh u la ong ruh ba ki khñiang jingpang jong katei ka jingpang ‘Bird flu’ ki don ka bor ban ktah jur ia ka met u briew haba ki iohlad ban rung hapoh ka met jong u.
Shuh shuh ruh u la ong ba lada ianujor ia ka jingma jong katei ka jingpang khlam ki sim bad ka khlam ‘Covid-19’, ka jingkhlaiñ bad jingktah jong u Covi-19 ka long tang 0.6 percent. Katba ka ‘Bird Flu’ pat ka don ia ka jingma ba ka lah ban ktah ia ka met jong u briew haduh kumba 25 percent haduh 50 percent.
Namar kata, utei u heh u la maham lypa ia ka jingma jong katei ka jingpang khlam ki sim kaba la lah ban pur sha kiwei pat ki jait mrad bad kumjuh ruh sha ki briew katkum ba la sakhi ia ka jinglong jingman jong kane ka pyrthei ha kane ka juk mynta.
Dang ha une u bnai ba la lah, ki heh ka US ki la pynbna ba la lap biang ia katei ka jingpang ha ki briew ha ka sien kaba lai bad kba long ruh ka jingma ia ka pyrthei baroh akwei namar ki doktor na kylleng ka pyrthei ki la lap ia 15 ngut kiba shah ktah bad ioh kem ia utei u khñiang jingpang ‘H5N1’ ha kito kiba la shah ktah bad kiba khlad noh syndon ruh hadien ba ki ioh kem ia utei u khñiang jingpang ba shyrkhei.
Wat la katta, la ong pat ba haduh mynta ki stad saïan bad ki doktor kiba pule bniah shaphang ka jingpur jong utei u khñiang jingpang, kim pat shym la lap pat ia ki sabut ba utei u khñiang jingpan un pur na uwei u briew sha uwei pat watla ki la lap ba utei u khñiang jingpang u la lah ban pur na ki sim ne ki syiar sha ki briew.
Hynrei, utei u heh u la ong ba lada utei u khñiang jingpang u la lap bha ban pyniadei ialade bad ka met jong u briew, dei ha kata ka por ba katei ka jingpang kan suk ban pur na uwei u briew sha uwei pat bad hangta katei ka khlam kan sa iohlad ban jur.
