Taipei, Jylliew:
U Myntri ka tnat ïada jong ka Taiwan- u Wellington Koo haba ai jingkren sha ki nongthoh khubor ha ka Lah Sngi U Blei, u la ong ba ka Taiwan kam shym kwah ban ia thut ne ban poi sha ka jingiakhun thma bad ka China hynrei ka leh ia ka kamram ban iada ia la u pud u sam na ka kti ka China.
Namar la ong ba ka Taiwan kaba la ioh synshar hi la ka jong naduh ki phew snem kiba la leit, ka la shah pynthut bad shah syntiat ha ki liengsuiñ thma bad ki jhad jong ka China na ka por sha ka por naba ka China ka kwah kam trai ruh ba katei ka ri dew lynnong Taiwan, kan long hi ka bynta jong ka, namar ka dei kaba shu pait na ka China bad ka China kan sa pyniasoh biang sha lade ia katei ka bynta kaba dei hok ka jong ka ha kano- kano ka por ka bym lah tip. Hynrei na ka liang ki heh nongialam ka Taiwan, ki la kyntait ia katei ka jingkam trai jong ka China bad ong ba ka Taiwan kam shym long ka bynta jong ka China mynno-mynno ruh bad kumta ruh ka Taiwan kan ialeh katba lah ban iada ia la u jong u pud- u sam ban tehlakam ia ki kam thombor bad ban lait ruh na ka kti jingsynshar jong ka China.
Kumjuh ruh u President ka Taiwan, u Lai Ching-te ha ka Sngi U Blei u la ai jingkren sha ki nongthoh khubor bad ong ba ka China ka ialeh katba lah ban pyni bor bad ban ioh khnieh hi noh ia ka bor synshar hapoh Taiwan, da kaba kam trai ruh ba ka Taiwan ka long ka bynta ba shu pait bad poi sakma na ka China namar ki daw ha ki por barim. Hynrei, u la ong ba ki bor pyniaid ka Taiwan kin nym aili ia katei ka jingkam trai jong ka China bad kan nym ailad ruh ia ki kam thombor ne ki jingleh pyni bor jong ka China bad kumta ruh ka Taiwan kan ialeh ban iada ia lade khnang ba kan lait na ka kti jong kiwei pat ki bor ba nabar.
Hynrei, haba la buh jingkylli pat haduh katno ka Taiwan kan lah ban pyn-eh bad ban ialeh pyrshah ia ka China lada khlem ka jingkyrshan jong ka United States, u Koo u la ong ba ka Taiwan kam shym pyrkhat ne shaniah hangno- hangno ruh ia kane hynrei ka Taiwan kan ialeh ban iada hi da lade- ia lade khnang ban pyntikna ia ka shongsuk- shongsaiñ ki paidbah nongshong shnong jongka.
Kumta, u Koo u la ong ba ka Taiwan kam shym peit na katei ka liang ba haduh katno kan lah ban iakhun bad pyn-eh da lade ia ka China khlem ka jingkyrshan jong ka US, hynrei ka jingthmu jong ka Taiwan ka long ban iada ia la u jong u pud- u sam da ka bor katba ka lah bad ban nym ailad ia ka China ne ia kiwei pat ki bor ba nabar ba kin leit ban ialeh pyrshah ne ban knieh ia ka bor synshar na ka kti ki nongialam jongka.
