Pynjem khnap ka Romania ïa ka Ukraine, lyngba u Schranz pynliem ka Slovakia ïa ka Belgium

Shillong, Jylliew 17

Ka Romania ka la lah ban pynliem ïa ka Ukraine haduh 3-0 kol na ka bynta ban ïoh ïa ka jingjop kaba nyngkong ha ka Euro 2024 ha ka Lah Sngi U Blei ha Allianz Arena kaba ha Munich.

Kane ka nam jop ka la wan urlong lyngba u Nicolae Stanciu, Razvan Gabriel Marin bad u Denis Mihai Dragus na ka bynta ban pynïoh lai point ha ka Group-E.

Ha kane ka jingïakhun baroh arliang mamla ki la pyrshang ban ïalehkai bha naduh kaba sdang ha kaba ki la ïoh ïa ki katto katne ki kabu kiba biang. Ka Romania ka la ïoh ban pynkhih jar nyngkong eh ha ka minit kaba 29 lyngba u Stanciu kum kapten. Kane ka shi kol ka la ïai neh haduh kaba kut jong ka kylla step na ka daw ba ka Ukraine kam shym la lah ban pynphai kol.

Hadien katto katne por ba la bteng biang ïa ka jingïakhun jong ka kylla miet, ka Romania ka la ïoh thep biang ïa ka kol ba ar ha ka minit kaba 53 lyngba u Marin bad ïa ka kol ba lai da u Dragus (57). Kumta haduh kaba kut jong ka jingïalehkai ka Ukraine kam shym la lah ban pynphai bad ka la mad ïa ka jingshah rem.

Haba phai sha kawei pat ka jingïakhun jong kane ka group, ka Slovakia ka la pynliem noh ïa ka Belgium lyngba ka shi kol ba la thep da u Ivan Schranz na ka bynta ban pynïoh ïa ka jingjop kaba nyngkong ha kane ka lympung.

Kane ka kol ka wan ruh na ka daw ka jingkheiñ sting ki rangïalehkai shadien ka Belgium bad pynlong pat ïa ka Slovakia ban ïoh thep ha ka minit kaba 7 lyngba u Schranz lyngba ka jingïarap pynbuh bol da u Juraj Kucka.

Hadien katto katne por ka Belgium ka la ïoh ïa ka kabu kaba biang lyngba u Romelu Lukaku hadien ka jingïarap pynbuh bol da u Kevin De Bruyne, hynrei utei u rangïalehkai ka Roma um shym la lah ban pynurlong. Kumjuh ka Slovakia ka la ïoh ïa ka kabu ksiar, hynrei kam shym la lah ban thep.

Hadien ba la bteng ïa ka jingïakhun jong ka kylla miet ka Belgium ka la pyrshang ban ïakhun tyngeh ha kaba u Lukaku u la ïoh ban thep thep kol, hynrei lyngba ka jingbishar bniah na ka VAR la lap ba ka dei ka ‘off side’. Wat la ka Belgium ka la ïai pyrshang ban ïoh thep kol, hynrei kam shym la lah ban pynurlong na ka daw ka jingshan tyngeh ki rangïalehkai shadien lem bad u rangapkol ka Slovakia u Martin Dubravka.

Kumta biang u Lukaku u la ïoh ban thep kol ha shwa ban wai ka jingïalehkai, hynrei u paralok ba ïarap pynbuh bol u Ikoma-Loïs Openda u la kum pyndei da ka kti ïa ka bol ha shwa ban pynbuh sha utei u rangïalehkai ka Roma.

Haduh kaba kut ka Belgium kam shym la lah ban pynurlong bad ka la mad ïa ka jingshah rem kaba nyngkong jong kane ka lympung.

Kumta ka Slovakia da kane ka jingjop kan ïakynduh pyrshah ïa ka Ukraine ha ka 21 tarik, katba ka Belgium ïa ka Romania ha ka 23 tarik mynta u bnai.