Shillong, Jylliew 17
Ka Muaythai Association of Meghalaya (MAM) ka la pdiang burom ïa ka kynhun ki nongïalehkai kiba la wanphai sha la ïing hadien ba kane ka kynhun la wan ha ka kyrdan ba-ar ha ka National United Muaythai Championship 2024 ba la pynlong dangshen ha Sonapur, Assam.
Ïa kane ka jingpynkup burom la pynlong ha ka Sngi Saitjaiñ ha Dorbar Shnong Demsenïong, Shil-long ha kaba la don lang u President ka synjuk u Bah Anjelus Sun, kiwei ki ‘riew rangbah bad kiwei kiwei.
Ha kane ka lympung la wan ïashim bynta da 865 ngut ki nongïalehkai kynthei bad shynrang na 28 tylli ki Jylla jong ka ri.
Kat kum ka kyrwoh la ong ba ki nongjop na ka kyrdan Senior kin leit shim bynta sha ka Senior Men and Women IFMA Muaythai World Championship ha u Jymmang 2025 ha Greece.
Katba ha ka Elite Class, u Pynnehbor Mylliemngap ha ka 48 kilo bad ka Monica Nongrum ha ka 70 kilo ki la shah jied ban mihkhmat ïa ka ri India ban leit ïashim bynta sha ka 6th Asian Indoor and Martial Arts Games ka ban long ha Bangkok naduh 21 haduh 30 tarik u Naiwieng 2024.
