Shillong, Jylliew 17
Ka lympung ïalehkai District Level Inter School Subroto Mukherjee Football Cup 2024 ba la pynïaid da ka shlem treikam jong ka District Sports Officer (DSO) East Jaiñtia Hills ka la jam sha ka semi final.
Ki kynhun kiba la rung semi final ha ka Under-15 jong shynrang ki long ka Khliahriat Presbyterian SS, Wapung HSS, Step By Step SS bad ka K.B Memorial SS, katba ha ka Under-17 jong kynthei ki long ka Lumchyrmit UPS, Lutus SS, Dkhiah East SS bad ka Musniang SS.
Ka Step By Step SS ka la pynjem khnap ïa ka Sham Sham SS haduh 5-0 kol. Ïa ki ar kol la thep da u Kevinson Dkhar (11& 45) bad u Ferdinand Tariang (25 & 35) bad ïa kawei pat la thep kham hashwa da u Euface Makhon (10).
Ha ka Under-15, ka Khliahriat Presbyterian ka la pynliem noh ïa ka Byndihati SS lyngba ka tie-breaker da 3-1 kol. Ka Wapung HSS ka la jop da 3-0 kol ia ka Lotus SS na Deinchynrum. Ïa kine la thep da u Nikormi Rymbai (16), Mekerlang Ryngkhlem (44) bad u Jeferson Dkhar (54).
Haba phai sha ka Under-17 (girls), ka Musniang SS ka la pynliem noh ïa ka Khliahriat HSS lyngba ka tie-breaker da 2-1 kol hadien ba kim shym la lah ban thep kol. Ka Dkhiah East SS ka la pynliem ïa ka Sham Sham SS lyngba ka shi kol ba la thep da ka Amethis Darnei ha ka minit kaba 40.
