Gangtok, Jylliew:
Ka jingpyllait im ïa palat 1,200 ngut ki nongjngoh kai pyrthei ha Mangan distrik kaba don ha Sikkim ka la sdang bad kane kan sa ïai bteng lada ailad ka suiñ bneng, la ïathuh ki heh ba dei khmih.
Kumba la mut, la ong ba kane ka jingpyllait im ïa kine ki briew, kan sa long lyngba na suiñ bad na ki surok katba shah ki jaka ha kaba la pynap ïa kiba bun ki Hotel kiba don ha Lachung na ka bynta ban ai jaka sah ïa ki, nalor kane yn sa pynbiang ruh ki jingbam bad ki jingdonkam baroh na ka bynta jong ki.
Lada ïakynduh jingeh ei ei, ki pulit ki la bthah ïa kine ki nongjngohkai pyrthei ba kin pyntip sha ki pulit jong ka Lachung, la ong u heh ba dei khmih.
U SDM u la pynlong ïa ka jingïalang bad u BDO jong ka Chungthang u Pipon Lachung bad kumjuh bad ki trai jong ki Hotel na ka bynta ban ïakren sani bha ha kaba ïadei bad ki jingpyntrekam na ka bynta ban pyllait im ïa kine ki nongjngohkai pyrthei.
Ki trai jong ki Hotel ki la shah hukum ba ki la dei ban ai jaka sah ïa ki nongjngohkai pyrthei katba ka jingpyntreikam ban pyllait im ïa ki kam pat kut, la ong u heh sorkar.
Ha kaba ïadei bad kane, u Myntri jong ka Roads & Bridges Department u N B Dahal u la leit sha Lachung bad ïakren bad ki nongjngohkai pyrthei bad sngap ïa ki jingud bad ki jingïakynduh jingeh jong ki bad pyntikna ba un sa pynïoh ki jingïarah sha ki kham kloi katba lah.
Ki la don kumba 6 ngut ki briew kiba la ïap ha Sikkim namar ki jingtwa khyndew kiba la jia na ka jingjur palat jong u slap ha kine ki khyndiat sngi ba la leit.
Kane ka jingthombor jong ki bor ka mariang ka la pynjulor ruh ïa kiba bun ki jingdon jingem bad pynduh ruh ïa ka bording bad kumjuh ki lad pynpoi bam sha kiba bun ki thaiñ, la ïathuh ki heh ba dei khmih.
