Guwahati, Jylliew:
Ym slem hadien ka jingshahkem jong uwei u samla Manipur ha ryngkat ki Battery jong ki Drone, ka kynhun Special Task Force (STF) jong ki pulit ka Assam ki la ïohkem sa ïa uwei u briew katba u dang pyrshang ban phah ïa ki tiar kiba long shi bynta jong ki Drone sha ki kynhun lehnoh kiba ha Manipur.
Ha kaba ïadei bad ka jingïai bteng jong ki ban trei shitom na ka bynta ban pynlong ïa ki jingkhynra bad ki jingjurip bniah halor ka jingthmu ban pynkut noh ïa ka jingpynpoi kum ïa kine ki jait tiar pyndonkam na ka bynta ki Drone sha Manipur khnang ban pynneh ïa ka shongsuk-shongsaiñ hapoh ka thaiñ, ka kynhun STF ha ka miet jong ka sngi Saitjaiñ ka la pynlong sa kawei pat ka jingleit khynra bad ïohkem ïa une u briew na ka thaiñ Rupnagar kaba don ha ka nongbah bad ïoh ruh ban kurup ïa ki tiar ba ju pyndait ha ki Drone haba la khmih bniah na u, la ïathuh u Chief Public Relations Officer (CPRO) jong ki pulit ka Assam, u Pranabjyoti Goswami ha ka jingthoh kaba u la phah.
Hadien bun kynta jong ka jingpyntreikam, ka kynhun STF ka la ïoh ban kem ïa une u briew ïa uba la tip kyrteng kum u Sanjib Kumar Mishra, uba dei u nongshong shnong jong ka thaiñ Noonmati kaba don ha Guwahati, katba u dang pyrshang ban phah ïa kine ki tiar jong ki Drone sha ki katto katne tylli ki kynhun lehnoh ha Manipur, la bynrap ka jingthoh.
Ka la don ka jingujor ha kaba ïadei bad kane ka jingjia ha ka jaka treikam jong ki pulit ka STF ha Guwahati ha kaba la pynngat ïa une uba la shahkem hapoh ka kyndon 121 jong ka Indian Penal Code (IPC) ryngkat ka 16/18 jong ka Unlawful Activities (Prevention) Act, 1967. Ka jingpyntreikam jong ka kynhun pulit ka la wanrah jingjop halor ka jingthmu ban ïakhun pyrshah halor ki kam pyntriem kiba ju jia ha Manipur, la bynrap shuh shuh ka jingthoh.
